МУС: У нядзельнай акцыі пратэсту ўзялі ўдзел 10 тысяч чалавек
Фота Дар'і Буракінай
Прэс-служба МУС у сваім тэлеграм-канале апублікавала прэс-рэліз наконт акцый пратэсту, што прайшлі ў гарадах Беларусі 4 кастрычніка.
Паведамляецца, што па краіне зафіксавана 10 пратэсных акцый. Ва ўсіх абласных цэнтрах, за выключэннем сталіцы, яны былі нешматлікія (ад 20 да 100 чалавек).
У Мінску агульная колькасць удзельнікаў склала каля 10 тысяч чалавек.
У дачыненні да «агрэсіўна настроеных грамадзян, якія ў парушэнне ПДР выходзілі на праезную частку і блакавалі рух транспарту, ужываліся вадамёты». У Віцебску для адцяснення натоўпу, які спрабавала адбіць затрыманага, а ў Гродне для затрымання п'янага пратэстоўца, які аказаў непадпарадкаванне міліцыянтам, ужываўся газ, паведамляе МУС.
Агулам былі затрыманыя 317 чалавек. Да разгляду ў судзе спраў па адміністрацыйных правапарушэннях у месцы ўтрымання затрыманых змешчаныя 258 чалавек.