Трампа пачалі лячыць ад COVID-19 стэроідным прэпаратам. Яго даюць цяжкім пацыентам
Прэзідэнт ЗША Дональд Трамп праходзіць лячэнне ад каранавіруснай інфекцыі з ужываннем стэроіднага прэпарата дэксаметазон, паведамляе Associated Press са спасылкай на дактароў.
Дактары пачалі ўжываць стэроід 3 кастрычніка разам з другой дозай прэпарата рэмдэсівір, у Трампа няма пабочных эфектаў. Дэксаметазон выкарыстоўвалі пасля таго, як узровень кіслароду ў арганізме Трампа ўпаў да 93%, паведаміў доктар амерыканскага прэзідэнта Шон Конлі.
Як адзначае тэлеканал CNBC, дэксаметазон паказаў сваю эфектыўнасць пры лячэнні цяжкіх пацыентаў з каранавірусам, але можа быць шкодны пры менш цяжкіх выпадках.
4 кастрычніка Дональд Трамп ненадоўга пакінуў ваенна-медыцынскі цэнтр у штаце Мэрыленд, дзе ён праходзіць лячэнне ад каранавіруса, каб праз акно аўтамабіля павітаць прыхільнікаў. Падчас паездкі Трамп быў у ахоўнай масцы.
