Praviły, jakija mohuć vyratavać žyćcio
DAI nahadvaje i rekamienduje: jak pavodzić siabie na zimovaj darozie.
Kaniec kastryčnika prynios pieršy śnieh. Miescami zafiksavanyja rekordy — u Viciebskaj vobłaści, naprykład, 31 kastryčnika nazirałasia rekordnaja za ŭsie hady mieteanazirańniaŭ vyšynia śniehu — da 26 sm.
Rańni pačatak zimy ź pieršym śnieham i hałalodam spryjaje ŭsplosku avaryjnaści na darohach, adznačajuć u DAI.
Tak, za minułuju piatnicu i vychadnyja, kali ŭ Biełarusi značna pahoršyłasia nadvorje, było zafiksavana 1315 DTZ z materyjalnaj škodaj. U 81 avaryi zahinuli 19 čałaviek, 89 byli paranienyja.
Sajt Dziaržaŭtainśpiekcyi ŭ čarhovy raz nahadvaje pra niekatoryja praviły, jakija nieabchodna ŭličvać pry kiravańni aŭto ŭzimku.
Pierš za ŭsio, kali vy hetaha jašče nie zrabili, — abaviazkova pakłapaciciesia ab zimovaj humie dla svajho aŭtamabila. Heta značna palepšyć kiravańnie aŭtamabilem va ŭmovach ślizkaj darohi i dapamoža skaracić tarmazny šlach.
Va ŭmovach abmiežavanaj bačnaści (a ŭ tumanie i padčas śniehu asabliva!), kirujučysia ŭstalavanymi znakami, vybirajcie biaśpiečnuju chutkaść ruchu z ulikam stanu prajeznaj častki i bačnaści ŭ napramku ruchu, paźbiahajcie rezkich tarmažeńniaŭ, asabliva na zakruhleńni darohi, pavialičcie dystancyju i bakavy intervał ruchu , admoŭciesia ad abhonaŭ, budźcie vielmi ŭvažlivymi pry prajeździe skryžavańniaŭ i piešachodnych pierachodaŭ.
Na ślizkaj darozie addavajcie pieravahu panižanym pieradačam. Pry hetym aŭtamabilem lahčej kiravać na spuskach, padjomach i ŭ płyni mašyn. Jon bolš pasłuchmiany i dynamičny. Tolki nie zabyvajcie, što pry jaździe navat na nievialikaj chutkaści hałalod nie daruje rezkaści ŭ ruchach ni pry pieraklučeńni pieradač, ni pry razhonie, ni pry manieŭravańni.
Na ślizkaj darozie lepš naohuł nie karystacca tarmazami. Rezkaje, a časam, navat płaŭnaje tarmažeńnie pryvodzić da błakavańnia kołaŭ i niepaźbiežnaha juzu abo zanosu. Tarmazić pry nieabchodnaści treba impulsna, adpuskajučy tormaz pry samym małym namioku na ślizhacieńnie. Darečy, mienavita hety pryncyp zakładzieny ŭ asnovu pracy antybłakirovačnaj sistemy tarmazoŭ.
Asabliva niebiaśpiečny hałalod na mastach, estakadach, vysokich nasypach, a taksama na padjezdach da prypynkaŭ hramadskaha transpartu, skryžavańniach i pierachodach. Lod tut utvarajecca niaredka navat tady, kali jaho niama na astatnich učastkach darohi. Pamiatajecie, tarmazić na takich učastkach vielmi niebiaśpiečna! Zahadzia źnižajcie chutkaść.
Pry lubym zapavoleńni ruchu (ruchavikom abo tarmazami) papiaredźcie pra svaje namiery kiroŭcaŭ, što jeduć za vami, źlohku kranuŭšy niekalki razoŭ piedal tormazu nahoj, nie tarmoziačy, a tolki ŭklučajučy stop-sihnał. Inakš mienavita zimoj vielmi vierahodna, što vas udarać zzadu.
I apošniaje, samaje hałoŭnaje. Usie tyja ciažkaści, ź jakimi vy sutykajeciesia na zimovaj darozie, adčuvajuć i inšyja kiroŭcy. Pasprabujcie stavicca da ich z pavahaj i razumieńniem.
Videa z rehistratara, zroblenaje kiroŭcam 27 kastryčnika pa darozie sa Starych Daroh.
