Pa Minsku jeździć «varanok» NKVD

Hety čorny retra-«Miersedes» vyłučajecca z ahulnaj płyni aŭto na minskich vulicach. Madel jaŭna davajennaja, ale vyhladaje «Miersedes» jak novy. Takija aŭtamabili prosta pavinny mieć cikavuju historyju.

«Naša Niva» pahutaryła z kiroŭcam aŭto i adnačasova jaho ŭłaśnikam Alaksandram Tarnoŭskim.

«Heta Mercedes Benz W36. U mianie jon z 1990 hoda, a da hetaha naležaŭ majmu dziedu, — kaža Alaksandr. — Jak možna zdahadacca ź indeksu madeli, mašyna była vyrablena ŭ 1936 hodzie. U Biełaruś jana trapiła ź Niamieččyny paśla skančeńnia vajny. Mabyć, u jakaści reparacyi, a mo była kanfiskavanaja savietami ŭ savieckich ža žaŭnieraŭ, jakija dajšli da Hiermanii i viartalisia dadomu chto na čym», — kaža Alaksandr.

U Biełarusi aŭtamabil staŭ «čornym varankom»:

«Mersedes» razam ź dziedam pracavaŭ u NKVD. Potym dzied vyjšoŭ na piensiju, a mašynu śpisali. Tut dzied jaje i «prychvatyzavaŭ».

Ale, na žal, nieviadoma, kaho mienavita vaziła ŭ tym «Miersedesie»: «A jak tut daviedaješsia? U NKVD šmat kaho ŭvohule vazili… Heta ad 1945–1946 da 1953, pakul usie nie pierasieli na «Pabiedy».

— Adrazu adkažu na standartnyja pytańni: kolki «žare» i kolki «pre», — vidać, Alaksandru nie ŭpieršyniu davać intervju. —

«Žare» šasnaccać (litraŭ na sto kiłamietraŭ — NN), «pre» sotniu.

Jak akazałasia,

aŭtamabil ekspłuatujecca z samaha 36-ha, na kansiervacyi nie stajaŭ.

Ale nijakich prablem z rehistracyjaj dy techahladam nie maje.

Na svoj viek «Miersedes» vyhladaje niabłaha. Navat kali ŭ sałonie — z draŭlanym rulavym kołam i skuranymi siadzieńniami — prajavy času i možna zaŭvažyć, to źniešnie ŭsio tak, jak i pavinna być u salidnaha retra-aŭtamabila: źziańnie chromu i bliskučy čorny mietalik.

Recept retra-aŭtaamatara Alaksandra Tarnoŭskaha davoli prosty: «Biareš mietałałom, a potym -nakolki chapaje ciarpieńnia, srodkaŭ dy času — davodziš da peŭnaha stanu. „Miersedes“, viadoma, možna było b adrestaŭravać i lepš, ale ja jak zrabiŭ 20 hod tamu, tak jon i jeździć».

Jak stała viadoma, stareńki W36 paśpieŭ uziać udzieł u 20 kinastužkach. Z apošniaha — sieryjał «ŚMIERŠ». Ale Alaksandr Tarnoŭski kaža, što

samym vialikim prajektam z udziełam čornaha «Miersedesa» stali zdymki ŭ sieryjale «Palavańnie na haŭlajtara»,

što adbyvalisia ŭ Babrujsku. Film raspaviadaje ab zamachu na haŭlajtera Biełarusi Vilhielma Kube, ździejśnienaha Alenaj Mazanik (rolu jakoj vykonvała Anastasija Zavaratniuk).

Alaksandr sam siadzieŭ za styrnom i hraŭ kiroŭcu esesaŭskaha kamisara.

Jon ŭvohule zaŭsiody kiruje svaimi mašynami sam.

Darečy, Mercedes Benz W36 nie adziny retra-kar Alaksandra;

jon vałodaje cełym aŭtaparkam: u jaho jość «Haz 12 ZiM» 1953-ha hoda i vializarny Pontiac Grand Prix Sport 1939-ha.

Ale «Miersedes» zastajecca samym starym u jahonaj kalekcyi.

Vidać, što Alaksandra cenić svaju pracu i kłopat, što układaje ŭ svaich «žaleznych siabroŭ» i nie šukaje lubuju mahčymaść prademanstravać ich śvietu. Navat udzielničaje tolki ŭ biaspłatnych dla samich udzielnikaŭ retra-rali:

— Ja liču, što maje mašyny vartyja taho, kab ja mieŭ mahčymaść demanstravać ich i nie płacić za heta.

KCH

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH