«Tutejšych» u Kupałaŭskim bolš nie budzie
Ad śpiektakla, jaki źbiraŭ poŭnyja zały i karystaŭsia pośpiecham, vyrašana admovicca.
«Tutejšyja» źniaty z našaha repiertuaru, — skazaŭ «Narodnaj Voli» zahadčyk litaraturnaj častki Nacyjanalnaha akademičnaha teatra imia Janki Kupały Ihar Skrypka.
— Zusim i nazaŭsiody. Pa‑pieršaje, «zdochli» dekaracyi. Pa‑druhoje, sastareli artysty. I pa‑treciaje, sastareŭ sam śpiektakl. Nakolki ja viedaju, Mikałaj Pinihin viartacca da hetaha śpiektakla nie budzie. Uvosień minułaha hoda ministr kultury Pavieł Łatuška cikaviŭsia ŭ Pinihina, ci płanujecca adnaŭleńnie «Tutejšych». Pinihin skazaŭ, što nie. Bo kožny śpiektakl maje svoj viek…
Viktaru Manajevu, jaki ihraŭ Mikitu Znosaka, u žniŭni hetaha hoda budzie 52 hady. A jahonamu hieroju ŭ pjesie Janki Kupały — 25—28. U našym teatry, kaniečnie, jość talenavitaja moładź, ale… Vy ŭjaŭlajecie, što takoje adnavić hety śpiektakl, uvieści absalutna novych artystaŭ? Heta faktyčna zrabić novuju pastanoŭku…»
Mikałaj Pinihin havoryć, što kali da jaho źvierniecca niechta z maładych režysioraŭ z prośbaj pastavić «Tutejšych» na Kupałaŭskaj scenie, to jon razhledzić jahonuju prapanovu.
«Mnie navat namieśnik ministra kultury Uładzimir Ryłatka prapanoŭvaŭ adnavić «Tutejšych», — raskazvaje Mikałaj Mikałajevič. — Paviercie, zaraz niama nijakich prablem z hetym śpiektaklem.
Ale ja jak mastak užo nie chaču da jaho viartacca. Hety śpiektakl zrabiŭ svaju spravu.
Niachaj niejki małady režysior pryjdzie i zrobić svaju viersiju «Tutejšych». Ja nie suprać. Ale ja nie ŭjaŭlaju, što heta budzie za śpiektakl bieź Viktara Manajeva. Mnie zdajecca, što ŭ teatry niama druhoha takoha artysta, jaki moh by heta syhrać. Ja zaraz «Pinskuju šlachtu» budu rabić u Varšavie. I mnie hałoŭny režysior teatra havaryŭ: maŭlaŭ, ja tabie znajdu artysta lepiej za Manajeva. Pašukaŭ hod i nie znajšoŭ. I skazaŭ: chaču Manajeva. I my ciapier pajedziem u Varšavu sa svaim śpiektaklem…»
***
Śpiektakl «Tutejšyja» pa adnajmiennym tvory Janki Kupały ŭ 1990 hodzie pastaviŭ viadomy režysior Mikałaj Pinihin. U 1992 hodzie «Tutejšyja» atrymali Dziaržaŭnuju premiju Biełarusi.
U śpiektakli byli zaniaty najlepšyja akciory Kupałaŭskaha teatra — Viktar Manajeŭ, Zoja Biełachvościk, Maryja Zacharevič, Hienadź Aŭsiańnikaŭ, Alaksandr Padabied i inšyja.
U finale «Tutejšych» łunaŭ bieł‑čyrvona‑bieły ściah. Niekatoryja hledačy padčas hetaj sceny vykrykvali «Žyvie Biełaruś!». Z hetaj nahody kala dziesiaci hadoŭ tamu kiraŭniki ad kultury sprabavali ŭsimi praŭdami i niapraŭdami źniać «palityčny» śpiektakl z repiertuaru. Na paŭtara hoda śpiektakl byŭ faktyčna zabaronieny. Pryblizna ŭ 2002 hodzie Mikałaj Pinihin adnaviŭ «Tutejšych». A potym śpiektakl iznoŭ źnik z repiertuaru…
