Ukrainka na miažy ź Biełaruśsiu ŭ zialonym kanale skazała pra hrošy. Minus $26 tysiač
Pierasiakajučy polska-biełaruskuju miažu na aŭtobusie, hramadzianka Ukrainy viezła z saboj bujnuju sumu hrošaj. Ale pravieźci ich joj nie ŭdałosia: u žančyny kanfiskavali sumu paśla taho, jak jana pajšła pa zialonym kanale. Ukrainka była nie suprać ich zadekłaravać, tolki nie viedała jak, piša «Lusterka».
Ilustracyjnaje fota Naša Niva
Pra hetuju spravu stała viadoma z pastanovy suda Maskoŭskaha rajona Bresta, dzie adbyvaŭsia sud nad žančynaj.
U pačatku 2024 hoda žančyna pradała na radzimie dom i aŭtamabil, i ŭ lutym z hrašyma viartałasia da svajho muža praź Biełaruś (raniej sužency vyjechali z terytoryi Ukrainy da svajakoŭ). Z saboj va ŭkrainki byli ŭsie hrošy, jakija nakapiła siamja i jakija ŭdałosia vyručyć za prodaž nieruchomaści i mašyny — usiaho 25 735 dalaraŭ, 375 jeŭra, 2600 rasijskich rubloŭ, piać biełaruskich rubloŭ i 11 hryŭniaŭ, što pa kursie roŭna amal 26,2 tys. dołaraŭ.
Padčas pierasiačeńnia miažy ŭkrainka pajšła razam ź inšymi pasažyrami pa zialonym kalidory. Da žančyny padyšoŭ mytnik i zapytaŭsia, ci viazie jana hrošy. Taja adkazała stanoŭča i pakazała sumu. Žančynu adviali ŭbok, pieraličyli hrošy i kanfiskavali ich, skłaŭšy pratakoł ab administratyŭnym pravaparušeńni pavodle č. 2 art. 15.5 KoAP ab niedekłaravańni hrašovych srodkaŭ.
Na sud, jaki adbyŭsia 28 sakavika 2024 hoda, žančyna nie źjaviłasia, jejnyja intaresy pradstaŭlaŭ advakat. Jon pryvioŭ tłumačeńni žančyny pra toje, što jana druhi raz u žyćci zajazdžała ŭ Biełaruś, z hrašyma — uvohule ŭpieršyniu. Jana nie viedała paradku dekłaravańnia, ale nie chavała, što mieła z saboj vialikuju sumu.
Na sudzie mytniki zajavili, što, pierastupiŭšy rysu zialonaha kalidora, žančyna faktyčna zajaviła pra adsutnaść tavaraŭ i hrošaj, jakija treba dekłaravać.
Da hetaha, maŭlaŭ, u jaje była mahčymaść aznajomicca ź infarmacyjnymi stendami pierad mytnym pastom, a z pytańniem ab paradku dekłaravańnia jana mahła źviarnucca da mytnika jašče da taho, jak pierasiekčy rysu zialonaha kalidora. Videafajły, vyniatyja z kamier mytni, na jakich pavinna było być zafiksavanaje pravaparušeńnie, u sudzie nie adkrylisia, što nie stała pieraškodaj dla sudździ.
U vyniku sud pryjšoŭ da vysnovy, što ŭkrainka vinavataja ŭ pravaparušeńni, i pryznačyŭ joj štraf u 5 bazavych vieličyń (200 rubloŭ), a taksama kanfiskavaŭ usiu niezadekłaravanuju sumu hrošaj. Pry hetym, jak adznačaje vydańnie, č. 2 art. 15.5 Kodeksa ab administratyŭnych pravaparušeńniach praduhledžvaje pakarańnie ŭ vyhladzie štrafu jak z kanfiskacyjaj niezadekłaravanych srodkaŭ, tak i bieź jaje. Tym nie mienš sudździa vyrašyła pakinuć ukrainku biez usich źbieražeńniaŭ siamji.
Čytajcie taksama:
Žychar Baranavičaŭ z-za techničnaj pamyłki atrymaŭ 700 tysiač rubloŭ, ale patraciŭ nie ŭsio
Cud nakłaŭ na Pratasieviča štraf — 24,5 miljona rubloŭ. Jon u šoku