Iran maksimalna nabliziŭsia da stvareńnia jadziernaj zbroi
Havorka idzie pra pieryjad u niekalki tydniaŭ.
Viarchoŭny lidar ajatała Ali Chamieniei vystupaje padčas cyrymonii, pryśviečanaj hadavinie śmierci lidara revalucyi 1979 hoda ajatały Chamiejni (na płakacie ŭviersie sprava) u jaho maŭzalei niedaloka ad Tehierana. Fota: Office of the Iranian Supreme Leader via AP
Na pačatku hetaha tydnia dyrektar Centra pieradavych daśledavańniaŭ u halinie biaśpieki, stratehii i intehracyi pry Bonskim univiersitecie Ulrych Šli ŭ razmovie z Bild papiaredziŭ, što «Iran znachodzicca na miažy taho, kab stvaryć jadziernuju zbroju». Pa słovach Šli, havorka idzie pra pieryjad u niekalki tydniaŭ.
Ciapier słovy ekśpierta paćviardžaje deputat, člen kamisii pa nacyjanalnaj biaśpiecy i zamiežnaj palitycy Irana Džavad Karymi Hadoŭsi.
U X (były Twitter) jon napisaŭ, što «kraina zaraz zdolnaja pravieści jadziernaje vyprabavańnie, papiaredziŭšy pra heta ŭsiaho za tydzień».
Paśla Hadoŭsi rastłumačyŭ, što ŭ vypadku pastupleńnia zahadu ad kiraŭnika Irana Ali Chamieniei vajennym spatrebicca ŭsiaho tydzień, kab «pravieści pieršaje vyprabavańnie rakiety dalokaściu da 12 000 kiłamietraŭ».
Dyrektar Mižnarodnaha ahienctva pa atamnaj enierhii (MAHATE) Rafael Hrosi ŭ intervju Deutsche Welle kazaŭ, što Iran, vierahodna, znachodzicca «chutčej u tydniach, čym u miesiacach» ad taho, kab atrymać dastatkova ŭzbahačanaha ŭranu dla stvareńnia jadziernaj bomby. Adnak heta jašče nie aznačaje, što praź niekalki tydniaŭ u Irana źjavicca jadziernaja zbroja.
«Dla stvareńnia funkcyjanalnaj jadziernaj bojehałoŭki patrabujecca mnostva inšych rečaŭ, jakija nie zaležać ad vytvorčaści rasščaplalnaha materyjału», — padkreśliŭ Hrosi.
