U ZŠA baćkoŭ padletka, jaki ŭčyniŭ stralbu ŭ škole, pasadzili minimum na 10 hadoŭ
Sud štata Mičyhan prysudziŭ baćkoŭ Itana Krambli, jaki ŭčyniŭ stralbu ŭ škole, u vyniku čaho zahinuli čatyry vučni, da turemnaha źniavoleńnia na termin ad 10 da 15 hadoŭ. Raniej jany byli pryznanyja vinavatymi ŭ nienaŭmysnym zabojstvie, piša Bi-bi-si.
Fota: Bill Pugliano/Getty Images
Džejms i Dženifier Krambli stali pieršymi baćkami, asudžanymi ŭ ZŠA za toje, što nie spynili svajho syna, jaki vidavočna znachodziŭsia ŭ nieadekvatnym psichičnym stanie.
Abodva vykazali škadavańnie z-za dziejańniaŭ svajho syna. Adnak Karen Makdonald, hałoŭnaja abvinavaŭca na pracesach (Dženifier i Džejmsa Krambli sudzili paasobku), zajaviła, što vielmi «rasčaravanaja» tym, što baćki małaletniaha zabojcy nie vykazali nijakaha raskajańnia.
«Toje, što jany zajavili, što škadujuć, heta naturalna, i my nie asprečvajem toj fakt, što jany škadujuć… ale heta — nie toje, što važna dla achviar złačynstvaŭ… bolš za ŭsio jany chacieli b pačuć pra raskajańnie, što aznačała b pryznańnie svajoj viny i niejkaje prymireńnie, abo prabačeńnie. A hetaha nie adbyłosia», — skazała jana žurnalistam paśla abviaščeńnia prysudu.
Sudździa Šerył Mećjuz zajaviła, što praciahłaść terminu źniavoleńnia tłumačycca niazdolnaściu abo niežadańniem baćkoŭ spynić syna.
«Jany [baćki] nie pavinny być ekstrasensami. Ale hetyja prysudy nie źviazanyja z drennym vychavańniem dziaciej. Jany tyčacca dziejańniaŭ, jakija mahli b spynić hety razahnany ciahnik, — zajaviła jana sudu. — A mahčymaść jaho spynić u ich była niekalki razoŭ, tryvožnyja sihnały razdavalisia ŭsio hučniej i hučniej, a jany ich ihnaravali».
Adbyŭšy 10 hadoŭ, Krambli zmohuć chadajničać ab umoŭna-daterminovym vyzvaleńni. Kali im budzie ŭ im admoŭlena, jany vyjduć na volu praz 15 hadoŭ.
Prakurory na pracesach śćviardžali, što Krambli nie reahavali na vidavočnyja prykmiety paharšeńnia psichičnaha zdaroŭja svajho syna i navat kupili jamu paŭaŭtamatyčny pistalet, jaki jon i vykarystaŭ dla stralby ŭ škole ŭ 2021 hodzie.
Itanu Kramli było 15 hadoŭ, kali jon zabiŭ čatyroch vučniaŭ i paraniŭ jašče siemiarych.
Za svajo złačynstva jon byŭ prysudžany da pažyćciovaha źniavoleńnia biez prava na daterminovaje vyzvaleńnie.
Pierad vyniasieńniem prysudu baćki zahinułych vystupili ŭ sudzie, emacyjna raspavioŭšy, da jakich nastupstvaŭ pryviali dziejańni Itana Kramli i biaździejnaść jaho baćkoŭ.
Nikol Basalej, maci 17-hadovaj achviary Medysan Bołduin, naŭprost źviarnułasia da Dženifier i Džejmsa: «Kali vy kuplali svajmu synu pistalet i navat nie trymali jaho pad zamkom, ja dapamahała svajoj dačce pisać školnaje sačynieńnie, — skazała Nikol sa ślazami na vačach. — Vy vyrašyli, što vychavańnie dziaciej nie źjaŭlajecca dla vas pryjarytetam, i ja straciła svaju dačku».
Džył Soaŭ, maci 17-hadovaha Džaścina Šylinha, jaki taksama zahinuŭ u vyniku ŭčynienaj Itanam stralby, była druhoj žančynaj, jakaja vystupiła z pramovaj. Jana adznačyła, što pieražytyja joju «žach i traŭma niemahčyma vykazać słovami».
Padčas vystupu jana prosta hladzieła na Džejmsa i Dženifier, abvinavaciŭšy ich u «niazdolnaści dziejničać», kab spynić trahiedyju.
«Kali b vy tolki zrabili što-niebudź, choć što-niebudź, kab źmianić chod padziej», — skazała jana.
Prakurory abvinavacili baćku i maci Itana ŭ ihnaravańni tryvožnych prykmiet, jakija śviedčyli ab roście kryzisu psichičnaha zdaroŭja ich syna, a taksama ŭ chałatnaści, bo jany nie tolki kupili jamu ahniastrelnuju zbroju, ale navat nie zachoŭvali jaje biaśpiečna.
Rekamiendacyi prakurora pa vyniasieńni surovaha prysudu byli zasnavanyja na tym, što Krambli abvinavačvałasia ŭ čatyroch vypadkach nienaŭmysnaha zabojstva, kali śmierć kožnaha vučnia razhladałasia jak asobnaje złačynstva.
Pierad vyniasieńniem prysudu pradstaŭnik abvinavačańnia začytaŭ rasšyfroŭku telefonnaha zvanka, jaki Džejms zrabiŭ z turmy. Jana była poŭnaja nienarmatyŭnaj leksiki i pahroz u adras hałoŭnaha prakurora.
Na heta jaho advakaty zajavili, što ich klijent prosta «vypluchnuŭ» emocyi, tamu i vykarystaŭ «hnieŭnyja» i «niepavažlivyja» vyrazy.
Paźniej baćka Itana padkreśliŭ, što škaduje ab tym, što adbyłosia i što jamu chaciełasia b, kab u minułym jon dziejničaŭ pa-inšamu.
U dzień stralby baćki Itana byli vyklikanyja ŭ škołu. Nastaŭniki chacieli abmierkavać ź imi vielmi tryvožny malunak, zrobleny ich synam. Adnak jany pierapynili razmovu, zajaviŭšy, što im treba iści na pracu, i adpravili syna nazad u kłas.
Nastaŭniki navat nie pravieryli zaplečnik, dzie lažaŭ pistalet.
Niezaležnaje rasśledavańnie, apublikavanaje ŭ minułym hodzie, vyjaviła šmatlikija parušeńni ŭ pracy škoły, uklučajučy rašeńnie dazvolić Itanu viarnucca ŭ kłas.
Čytajcie taksama:
Stralba ŭ škole ŭ Finlandyi: adzin školnik zahinuŭ, dvoje atrymali ranieńni. Strałku — 13 hadoŭ
Pahladzicie, jak vyhladaje turma Brejvika. Narviežski teraryst skardzicca na ŭmovy
