Biełaruskija reki poŭnyja vady i ŭžo vychodziać ź bierahoŭ
Uzrovień vady ŭ biełaruskich rekach pieravysiŭ niebiaśpiečnuju adznaku. Abvieščana štarmavoje hidrałahičnaje apaviaščeńnie, paviedamlaje Biełhidramiet.
Sinoptyki paviedamlajuć, što ŭzrovień vady na Prypiaci ŭ Žytkavickim rajonie pieravysiŭ niebiaśpiečnuju adznaku, zatoplenyja prybiarežnyja terytoryi.
Taksama ŭ viedamstvie papiaredzili, što ŭ najbližejšyja dni krytyčnuju adznaku pieravysić uzrovień vady na prytoku Prypiaci — race Ubarć kala vioski Krasnabiarežža ŭ Lelčyckim rajonie. Tut taksama jość ryzyka zatapleńnia navakolnych terytoryj.
Akramia taho, uskrylisia Biarezina ŭ rajonie Barysava i Vilija ŭ rajonie vioski Małaja Śviranka, ačyścilisia ad lodu i niekatoryja prytoki Vilii.
Hidrasinoptyki adznačajuć, što na bolšaści rek krainy nazirajucca vahańni ŭzroŭniu vady, a ŭ basiejnach Buha, Biareziny i Prypiaci jon raście z chutkaściu 1-15 sm u sutki. Uzrovień vady ŭžo pieravysiŭ krytyčnuju adznaku na Prypiaci kala Pietrykava, na Pcičy kala vioski Pieršaja Słabodka, na Słučy kala ahraharadka Lenin i na Cnie kala ahraharadka Dziatłavičy. Taksama ŭzroŭni vady blizkija da krytyčnych adznak na Niomanie kala Stoŭbcaŭ, race Ščara kala Słonima.
U viedamstvie adznačyli, što zatapleńnie prybiarežnych terytoryj nazirajecca i ŭ bolšaści rajonaŭ Homielskaj vobłaści, jak taksama ŭ niekatorych rajonach Bresckaj, Hrodzienskaj, Minskaj i Mahiloŭskaj abłaściej.
U Biełhidramiecie padkreślili, što ledastaŭ jašče nazirajecca na Dniapry, Sožy, bolšaj častcy Dźviny i Biareziny. Adnak śpiecyjalisty padkreślivajuć, što ŭ ledzianym pokryvie źjaŭlajucca ŭčastki z adkrytaj vadoj, jakaja taksama prastupaje na pavierchni lodu, što robić pieramiaščeńnie niebiaśpiečnym.
Ledzianoje pokryva pakul jašče taksama jość na vadaschoviščach Čyhirynskaje, Zasłaŭskaje, Vilejskaje, Salihorskaje, Čyrvonaja Słabada, aziorach Narač, Łukomskaje, Dryviaty i Čyrvonaje.
Čytajcie taksama:
Viasna nie za harami. Miescami ŭ nastupnyja dni da +12°S
