Ci moža prapahanda ŁHBT paŭpłyvać na seksualnuju aryjentacyju? Voś što kaža psichaseksołah
Apošnim časam ułady zakłapacilisia pra tradycyjnyja kaštoŭnaści. Natalla Kačanava śćviardžała, što na pramuju liniju joj telefanavali baćki, zaniepakojenyja prapahandaj nietradycyjnych kaštoŭnaściaŭ u internecie. Hienprakuratura źbirajecca ŭvieści administracyjnuju adkaznaść za prapahandu nietradycyjnych seksualnych adnosin i čajłdfry. «Naša Niva» spytała ŭ psichaseksołaha, ci moža prapahanda ŁHBT abo jaje adsutnaść paŭpłyvać na seksualnuju aryjentacyju.
Ilustracyjny zdymak. Fota: Getty Images/Arctic-Images
«Zabarona tolki pavialičvaje napružańnie»
Psichaseksołah Vijaleta Nikicik adznačaje, što tatalnaja zabarona ŭsiaho, što moža być źviazana z ŁHBT, nie pryviadzie da taho, što takija ludzi pierastanuć isnavać ci niechta ź ich «vyzdaravieje».
«Lubyja zabarony pierš za ŭsio ŭpłyvajuć na toje, što ŭ homaseksualnych ludziej źjavicca bolš strachu, što da ich budzie prymieniena niejkaje pakarańnie, kali niechta daviedajecca pra ich aryjentacyju».
Śpiecyjalistka ličyć, što zabarona lubych prajaŭ ŁHBT dziaržavaj adabjecca taksama i na tych ludziach, jakija majuć takija schilnaści, ale da kanca nie pryznajucca ŭ hetym.
«Taki čałaviek budzie jašče bolš vymušany heta chavać, i ŭ hetym vypadku, u niejkija kryzisnyja momanty, heta moža vylicca ŭ dadatkovuju ahresiju abo prajavicca niejkim inšym niečakanym dla samoha čałavieka čynam.
U vyniku zabarona tolki pavialičvaje napružańnie, zahaniaje hetaje pačućcio ŭ padpolle, što moža pryvieści da niehatyŭnych prajaŭ i nastupstvaŭ u budučyni», — ličyć śpiecyjalistka.
Pa słovach Vijalety Nikicik, navukoŭcami dakazana, što častka papulacyi, niekalki pracentaŭ, maje homaseksualnyja schilnaści.
«Jość pytańni da samich prapahandystaŭ»
Śpiecyjalistka miarkuje, što ŭsurjoz usprymać toje, što prapahanda moža ŭpłyvać na seksualnuju aryjentacyju čałavieka, mohuć tolki tyja, chto nie razumieje navuku. Tamu ŭ jaje ŭźnikajuć pytańni da prapahandystaŭ, jakija imknucca ŭsio heta zabaranić.
«Chutčej za ŭsio, heta tyja samyja ludzi, jakija nie mohuć pryniać svaju seksualnaść, majuć traŭmy i psichałahičnyja kompleksy», — ličyć psichaseksołah.
«Bijałohija pra toje, što niezaležna ad taho, jość prapahanda ci jaje niama, takija ludzi ŭsio adno buduć. I ich pracent budzie roźnicca tolki ad ščylnaści nasielnictva. Tak było 50, 100 i tysiaču hadoŭ tamu».
Psichaseksołah upeŭnienaja, što ni prapahanda ŁHBT-kaštoŭnaściej, ni ich antyprapahanda nie mohuć paŭpłyvajuć na bijałahičnyja pracesy ludziej. Adpaviedna i na kolkaść homaseksualnych ludziej.
«Z prapahandaj ci biez takich ludziej budzie niekalki pracentaŭ. Tatalnaja zabarona moža pryvieści da taho, što takija ludzi buduć vymušanyja hłybiej sychodzić u padpolle. Jany čaściej buduć upadać u depresiju, siarod ich buduć čaściej sustrakacca vypadki suicydu.
I adbyvacca heta budzie nie praz toje, što jany «chvoryja», a praz toje, što ŭ dziaržavie i hramadstvie isnuje hetaje napružańnie i niehatyŭnaje staŭleńnie da ich tolki praź inšuju seksualnuju aryjentacyju», — adznačaje psichaseksołah.
Čytajcie taksama:
«Natalla Ivanaŭna, kali treba sabrać podpisy, my źbiarom». Ułady nahniatajuć hamafobnuju isteryju
Uvodzicca administracyjnaja adkaznaść za «prapahandu nietradycyjnych seksualnych adnosin» i biaździetnaści
«Miehatop» źniaŭ rekłamu, dzie mužčyna ŭ ružovym paradziruje Kery Bredšou. I narvaŭsia na HUBAZiK
Błohiera-miljońnika Dzim Dzimyča, jakoha abvinavacili ŭ prapahandzie ŁHBT, prymusili apraŭdvacca na strymie ŭ Azaronka
