«Niaŭžo heta mahčyma — biehčy tam, dzie ciabie zatrymlivali?» Volha Chižynkova pra «Minski paŭmarafon»
Na 12 vieraśnia zaplanavany «Mienski paŭmaraton», jaki ŭ raniejšyja hady źbiraŭ pad paŭsotni tysiač amataraŭ biehu z roznych krain. Hetym razam skład udzielnikaŭ budzie istotna mienšy, a spartovy forum atrymaje idealahičnuju nahruzku, piša Svaboda.
Adnoj ź vizytovak usich papiarednich zabiehaŭ była Volha Chižynkova — prafesijnaja madel, pieramožca konkursu «Mis Biełaruś — 2008», eks-vykładčyca Nacyjanalnaj škoły pryhažości, byłaja supracoŭnica systemy futbolnaha klubu «Dynama» (Bieraście), abaronca biazdomnych žyviołaŭ.
Jana zaciata prapahandavała zdarovy ład žyćcia i paŭdzielničała ŭ dziasiatkach dabračynnych zabiehaŭ, uklučna z usimi papiarednimi «Mienskimi paŭmaratonami». Adnak sioleta jaje proźvišča adsutničaje ŭ kamandzie Dream Team, śpis jakoj strakacić spartoŭcami-padpisantami lista za režym, čynoŭnikami, prapahandystami.
Vakantnaje miesca zaniała «Mis Biełaruś — 2018», deputatka Pałaty pradstaŭnikoŭ i prychilnica siońniašniaj ułady Maryja Vasilevič.
Svaboda pacikaviłasia ŭ Volhi Chižynkovaj, ci sapraŭdy jana nie zajaŭlałasia na start «Mienskaha paŭmaratonu».
«Što vy, jaki paŭmaraton? Niaŭžo heta mahčyma — biehčy tam, dzie zusim niadaŭna ty biehaŭ ad amapaŭcaŭ, dzie ciabie zatrymlivali. Dy i ŭvohule, paŭmaraton — heta ŭ pieršuju čarhu śviata, jakoje, darečy, ja nikoli nie prapuskała. Ale nastroj, zrazumieła, zusim nie śviatočny», — adznačyła ŭ kamentary Svabodzie Volha Chižynkova.
U vieraśni paśla hadavoha pierapynku projdzie Minski paŭmarafon. Minułaj vosieńniu aficyjnaj pryčynaj admieny zabiehaŭ staŭ karanavirus. Tradyjna na dystancyju vyjdzie zornaja kamanda Dream Team. U joj zajaŭlenyja sielebryci, ale sioleta ŭ składzie zastalisia ŭ asnoŭnym čynoŭniki i prapahandysty, jość i niekalki biznesoŭcaŭ.
Chto biehaŭ za Dream Team u papiarednija hady? Naprykład, viadomyja marafonki Volha Mazuronak i Śviatłana Kudzielič. Stałaj udzielnicaj była «mis Biełaruś» Volha Chižynkova. Z televiadučych da kamandy dałučalisia Jaŭhien Pierlin i Ivan Padrez. Nikoha ź ich niama ciapier u zornaj kamandzie. Bolšaść ź ich u 2020-m padtrymała narod, jaki čakaŭ pieramienaŭ paśla vybaraŭ.
Niekalki hod zapar na dystancyju vychodziła pasoł Vialikabrytanii Fijona Hib. Sioleta ŭ kamandzie nie zhadvajucca jeŭrapiejskija dypłamaty.
Niama tam i eks-kiraŭnika Biełaruskaj fiederacyi lohkaj atletyki Vadzima Dzieviatoŭskaha. Treba skazać, šmat u čym dziakujučy jamu paŭmarafon staŭ pravodzicca ŭ Minsku.
Pasadu ŭ fiederacyi Dzieviatoŭski straciŭ paśla vybaraŭ. Papiaredničała hetamu dziŭnaja historyja. U žniŭni atlet, jaki raniej padtrymlivaŭ dziejnuju ŭładu, raptam napisaŭ «Łukašenka — nie moj prezident». Pa dziaržTB paśla skazali, što post byŭ zrobleny na emocyjach, a Dzieviatoŭski špitalizavany ź niervovym zryvam. Paźniej ŭ siecivie źjaviłasia infarmacyja, što bratoŭ Dzieviatoŭskich žorstka zatrymlivali paśla vybaraŭ.
Ciapierašniaja kamanda Dream Team — heta łajalnyja ŭładzie i pravieranyja ludzi. Pres-sakratarka Łukašenki Natalla Ejsmant, pieršy namieśnik kiraŭnika Administracyi prezidenta Maksim Ryžankoŭ, ministr sportu Siarhiej Kavalčuk, načalnik hałoŭnaha ŭpraŭleńnia pa achovie zdaroŭja Mahiloŭskaha abłvykankama Alaksandr Staravojtaŭ. Siarod inšych tam zastalisia kiraŭnik ANT Marat Markaŭ, televiadučaja BT Viktoryja Siankievič i deputatka Maryja Vasilevič.
