«Heta klučavy ekanamičny vyklik». Zamiežnaja zapazyčanaść Biełarusi bje rekordy
Vałavaja zamiežnaja zapazyčanaść Biełarusi na 1 studzienia 2021 hoda skłała 42,149 młrd dalaraŭ, paviedamlaje pres-słužba Nacbanka.
Za minuły hod jana pavialičyłasia na 1,4 młrd dalaraŭ. Refinansavać i vypłacić nastupnyja ŭ hetym hodzie płaciažy pa zamiežnych pazykach urada, bankaŭ i biełaruskich kampanij u štatnym režymie budzie ciažka, ličyć ekśpiert Tut.by.
Sukupnaja zamiežnaja zapazyčanaść Biełarusi pieravysiła 42 młrd dalaraŭ. Na dolu ŭrada prypadaje 18,586 młrd dalaraŭ zapazyčanaści, Nacbanka — 821 młn, bankaŭ i niabankaŭskich kredytna-finansavych arhanizacyj — 5,1 młrd, subjektaŭ haspadarańnia — 15,4 młrd dalaraŭ, vynikaje sa źviestak Nacbanka. Adnak važny nie stolki pamier zapazyčanaściaŭ, kolki patencyjał vykanańnia abaviazkaŭ pa ich.
Biełaruś apynułasia ŭ takoj ekanamičnaj situacyi, kali, z adnaho boku, nazapašanaja rekordnaja źniešniaja zapazyčanaść, z druhoha boku istotna pahoršyŭsia dostup da mižnarodnych finansavych rynkaŭ. Na hetym fonie značna zvužajucca mahčymaści dla refinansavańnia zamiežnych abaviazkaŭ rezidentaŭ Biełarusi, bo robicca składaniej pryciahnuć novyja zamiežnyja resursy.
Heta klučavy ekanamičny vyklik dla Biełarusi ŭ 2021 hodzie. Na dumku analityka daśledčaj hrupy BusinessForecast.by Alaksandra Muchi, z punktu hledžańnia pahašeńnia i absłuhoŭvańnia zamiežnaj zapazyčanaści rezidentaŭ Biełarusi biahučy hod budzie adnym z najciažejšych za ŭsiu historyju niezaležnaj Biełarusi.
Pavodle acenak ekanamista, nastupnyja hadavyja płaciažy asnoŭnaha doŭhu i pracentaŭ pa zamiežnaj zapazyčanaści siektara dziaržkiravańnia, bankaŭ i subjektaŭ haspadarańnia mohuć pieravysić 17 młrd dalaraŭ. Taki vialiki pamier źviazany ŭ tym liku z tym, što ŭ im uličvajucca płaciažy, źviazanyja z absłuhoŭvańniem, i z-za płaciažoŭ, termin jakich nie ŭstanoŭleny (kali kredytory zapatrabujuć ich viartańnia). Va ŭmovach palityčnaha kryzisu i sankcyjnaha cisku z boku zachodnich dziaržaŭ refinansavać i vypłacić hetyja płaciažy ŭ štatnym režymie budzie vielmi ciažka.
Adčuvalnyja dla ekanomiki płaciažy pa zamiežnaj zapazyčanaści va ŭmovach rezkaha paharšeńnia dostupu da novych źniešnich zapazyčańniaŭ buduć istotna abmiažoŭvać tempy ekanamičnaha rostu ŭ Biełarusi.
— Kali raniej va ŭrada byli valutnyja płaciažy pa 3-3,5 młrd dalaraŭ pa valutnym dziaržaŭnym doŭhu i bolš za pałovu hetaj sumy Minfin moh refinansavać, to ciapier z-za palityčnaj situacyi niemahčyma pryciahnuć novyja zamiežnyja zapazyčańni na mižnarodnych finansavych rynkach. A hrafik płaciažoŭ pa vonkavym abaviazku dziaržavy i inšych rezidentaŭ Biełarusi zastajecca napružanym, — kaža Alaksandr Mucha. — U hetym vypadku prablema zamiežnaj zapazyčanaści moža zakranuć samyja šyrokija płasty nasielnictva: rabotnikaŭ, jakija atrymlivajuć vypłaty ź dziaržaŭnaha biudžetu, piensijanieraŭ i asob, jakija atrymlivajuć sacyjalnyja dapamohi. Tamu što va ŭmovach, kali bolš značnyja srodki treba nakiroŭvać na pahašeńnie i absłuhoŭvańnie zamiežnaj zapazyčanaści, mahčymaści ŭrada pa pavyšeńni piensij i zarobkaŭ biudžetnikaŭ istotna zvužajucca.
U toj ža čas uzmacniajucca ryzyki, źviazanyja ź niesvoječasovym pahašeńniem i absłuhoŭvańniem zamiežnych daŭhavych abaviazkaŭ rezidentaŭ Biełarusi. Na hetym fonie ŭ biahučym hodzie možna čakać rostu praterminavanaj zamiežnaj zapazyčanaści rezidentaŭ Biełarusi, adznačaje ekśpiert.
