Pamior komik, aŭtar «Rudabielskaj pakazuchi» Vasil Kačenia. Jamu było ŭsiaho 36 hadoŭ
Pra heta «Našaj Nivie» raskazaŭ jahony siabar Andrej Pavuk. Pryčyny śmierci nieviadomyja. Brat znajšoŭ Vasila niežyvym na padłozie, kali zajšoŭ praviedać.
Vasil Kačenia, fota z Ukantakcie.
«My z Vasilom znajomyja ad pačatku 2000-ch. Sam jon rodam ź Jelska, a ŭ Akciabrskim apynuŭsia jak pierasialeniec.
Vasil vučyŭsia na mastaka ŭ Babrujsku, tam trapiŭ u rycarski kłub. Viedaju, što ŭznaŭlaŭ šlemy, miačy.
Pryjazdžaŭ z rycarami da nas na dzień horada. Heta byŭ vielmi charyzmatyčny, impazantny čałaviek, mietalist, žartaŭnik. I kali ja pačaŭ zajmacca błohierstvam, z raźlikam na šou, to ŭspomniŭ pra Vasila», — raskazvaje Pavuk.
Vasil Kačenia palubiŭsia publicy. Čytajučy aficyjnyja naviny, rabiŭ heta na trasiancy, paradyjna, vielmi talenavita. Ludziam padabałasia hetaja ipastaś Vasila, zdajecca, jamu atrymałasia realizavać siabie ŭ roli viadoŭcy i akciora.
Da supracy błohieraŭ zaprašaŭ telekanał «Biełsat», jany mieli kolki chvilin u humarystyčnaj pieradačy «Viačernija špili».
Na žal, Kačenia mieŭ vialikuju zahanu, a mienavita — luboŭ da ałkaholu. Chutčej za ŭsio, mienavita heta i stała pryčynaj śmierci. Kačenia moh na tydni sychodzić u zapoj, nidzie nie źjaŭlacca, asabliva kali pajšli achviaravańni za videa «Rudabielskaj pakazuchi».
Raniej na žyćcio jon zarablaŭ tym, što farbavaŭ mašyny, rabiŭ zvarščykam.
Andrej Pavuk vosieńniu źjechaŭ u Litvu, prapanavaŭ heta zrabić i Vasilu, ale jamu było ciažka mianiać svoj ład žyćcia, tamu mužčyna zastaŭsia ŭ Biełarusi.
Viadoma, što pa miescy prapiski Kačeni siłaviki prychodzili z vobšukam pa spravie ab masavych biesparadkach. U jakaści kaho tam prachodziŭ Kačenia, niezrazumieła.
