«Nielha hańbić Ermitaž». Rasijskaja vystava Fabierže vyklikała skandał
Kalekcyjanier Andrej Ružnikaŭ śćviardžaje, što siarod ekspanataŭ vystavy — jak minimum 20 padrobak, i abvinavačvaje dyrektara Ermitaža Michaiła Pijatroŭskaha ŭ padryvie aŭtarytetu muzieja.
Fota Depositphotos.com
Ermitaž zaklikajuć zakryć vystavu Fabierže, jakaja składajecca ŭ tym liku z asabistaj kalekcyi miljardera Alaksandra Ivanova, paśla taho, jak viadomy ekśpiert Andrej Ružnikaŭ zajaviŭ pra najaŭnaść u kalekcyi šmatlikich padrobak, piša The Guardian.
U liście art-dyler Andrej Ružnikaŭ abvinavaciŭ dyrektara Ermitaža ŭ padryvie aŭtarytetu muzieja paśla arhanizacyi vystavy «Fabierže: juvielir impieratarskaha dvara», jakaja musić doŭžycca da 14 sakavika.
Ružnikaŭ pierakonvaje, što ŭ vystavie nie mienš za 20 padrobak, tamu vystavu, jakaja źjaŭlajecca pieršaj vialikaj padziejaj datyčna Fabierže ŭ Sankt-Pieciarburhu z 1993 hoda, treba nieadkładna zakryć. «Ja chaču, kab hetaja hańba skončyłasia. Ja chaču, kab vystavu zakryli i zabylisia pra jaje. Nielha tak hańbić Ermitaž», — śćviardžaje jon.
Ermitaž i Alaksandr Ivanoŭ abviarhajuć hetyja pretenzii. Miljarder pradastaŭlaje dakumienty, što paćviardžajuć sapraŭdnaść ekspanataŭ, jakija Ermitaž pryvioz z Muzieja Fabierže ŭ Baden-Badenie, zasnavanaha Alaksandram Ivanovym u 2009 hodzie.
U centr sprečki trapiła «Jubilejnaje jajka», jakoje byccam Mikałaj II padaryŭ impieratrycy Alaksandry Fiodaraŭnie na 10-ju hadavinu ich viasiella ŭ 1904 hodzie.
Cikavaść rasijan da tvorčaści Karła Fabierže, juvielira z Sankt-Pieciarburha, čyja majsternia aficyjna pastaŭlała kaštoŭnaści ŭ impieratarski dvor z 1885 da 1917 hoda, u apošnija hady značna vyrasła. Pasiarednikam pamiž kalekcyjanierami i ekspanatami Fabierže vystupaje rasijski miljarder Alaksandr Ivanoŭ, jaki staŭ viadomy ŭ Jeŭropie paśla hučnaha nabyćcia juvielirnych kaštoŭnaściaŭ.
