Što my słuchali ŭ listapadzie — dziesiać najcikaviejšych albomaŭ miesiaca AŬDYJA
Vašaj uvazie — apošni ahlad muzyčnych navinak u 2020 hodzie. Relizy na luby hust.
Martin Nonstatic — Treeline
Druhaja častka muzyčnaha trypcicha dydžeja, jaki žyvie ŭ Aŭstryi.
Vypuščany na viadomym francuzskim łejble Ultimae, reliz adpraŭlaje słuchača ŭ dalokuju vandroŭku ŭ hłybiniu elektronnaj muzyki na stykach roznych stylaŭ.
Ólafur Arnalds — some kind of peace
Novy albom isłandskaha kampazitara — heta asobasny i tvorčy rost na fonie chaosu, jaki dziejecca ŭ śviecie.
U muzycy vy pačujecie asabistyja pieražyvańni kampazitara, časam navat frahmienty samych značnych padziej ź jaho žyćcia. Praca zaviaršajecca kampazicyjaj Undone, u jakoj vykarystany ŭryvak pramovy pamierłaj amierykanskaj śpiavački Łchasy de Seły z razvažańniami ab tym, što naradžeńnie — heta toje ž samaje, što śmierć. Heta źjaŭlajecca hałoŭnaj temaj usiaho alboma.
Ennio Morricone — Morricone Segreto
U paśmiarotny albom Morricone Segreto italjanskaha kampazitara Enia Marykone ŭvajšli 27 kampazicyj, jaki musiać pakazać «schavany ciomny i psichadeličny bok maestra».
Albom achoplivaje tvorčaść Marykone z 1960-ch pa 1980-ja, samy plonny pieryjad u jaho tvorčaści, a taksama ŭklučaje kampazicyi, napisanyja dla mienš viadomych ekśpierymientalnych i žanravych filmaŭ.
Kylie Minogue — DISCO
Zorki minułych hadoŭ časta sprabujuć zaskočyć u muzyčny ciahnik, kab paśpieć za siońniašnimi trendami, i pačynajuć muzyčnyja ekśpierymienty. Zvyčajna heta ničym dobrym nie zakančvajecca.
Ale piatnaccaty albom aŭstralijskaj zorki vyjšaŭ vydatna spradziusavanym i prapracavanym. Hulaj, tancuj, atrymlivaj asałodu ad žyćcia, ale prytrymlivajsia mier biaśpieki — taki mesedž dasyłaje nam Kajli Minoŭh.
King Gizzard & The Lizard Wizard — K.G.
U epochu karejskaha popu i roku z elektronnymi matyvami ŭsio jašče zastajucca artysty, jakija nie bajacca źmiešvać chipi-estetyku siamidziasiatych, psichadeličnyja falkłornyja rytmy i fry-džaz, a potym jašče i atrymlivać asałodu ad taho chaosu, jaki jany panakručvali.
Kali vam cikavyja takija ekśpierymienty, to raim aznajomicca z tvorčaściu aŭstralijskaha hurta ź dziŭnaj nazvaj.
Molchat Doma — Monumient
Paradaksalny biełaruski hurt, jaki na radzimie daść pieršy solny kancert tolki 5 śniežnia i jaki bolš viadomy i papularny za miažoj, vypuściŭ novy albom na aŭtarytetnym amierykanskim łejble.
U vokładcy šmat chto moh zaŭvažyć palityčny padtekst, ale muzykanty abviarhajuć heta i admaŭlajucca vykazvacca pra palityku. Prosta manumient jak častka brutalnaj architektury.
AC/DC — Power Up
Nie starejuć dušoj vieterany. Ad atmaśfiernaj elektroniki i post-panku pierachodzim da zvyšenierhičnaha roku.
Svoj siamnaccaty albom AC/DC pryśviacili pamiaci svajho zasnavalnika i hitarysta Małkalma Janha, jaki pamior try hady tamu.
Reliz adrazu zaniaŭ pieršyja radki šmatlikich mižnarodnych chit-paradaŭ. Voś što značyć narodnaja muzyka, jakaja nikoli nie pastareje.
AnnenMayKantereit — 12
U niamieckaj movie jość vyraz «Es ist fünf vor zwölf» — značyć niešta kštałtu «u nas zastałosia mała času». A prosta zwölf (12) — heta kali ŭžo času zusim niama i treba vielmi śpiašacca.
Raim vam aznajomicca z tvorčaściu niamieckaha hurta, jaki vy palubicie za niezvyčajny vakał.
The Smashing Pumpkins — CYR
Adzinaccaty albom čykahskich alternatyŭščykaŭ. Jak raspavioŭ pra jaho lidar TSP Bili Korhan, jamu nadakučyła stvarać muzyku, pra jakuju ŭsie kazali, što jana hučyć niesučasna.
Jon paabiacaŭ zapisać albom sučasnaj muzyki, u vyniku atrymaŭsia CYR. Acanicie sami, nakolki jon hučyć u adpaviednaści ź siońniašnimi muzyčnymi tendencyjami.
Miley Cyrus — Plastic Hearts
Śpiavačka vypuściła pieršy za try hady poŭnafarmatny albom, vykanany ŭ papularnaj siońnia retrastylistycy.
U «Plastic Hearts» Majli Sajrus prymiaraje na siabie vobraz rok-dzivy 80-ch. Letaś śpiavačka zajaŭlała pra namier vypuścić tryłohiju karotkich albomaŭ, jakaja pavinna była skłaścisia ŭ płytku «She is Miley Cyrus», ale z toj zadumki vyjšaŭ tolki adzin zapłanavany mini-albom «She is Coming».
U 2020 hodzie zorka pieradumała i ŭziała kurs na estetyku vaśmidziasiatych.
