Apieratarku «Biełsata» padazrajuć u kryminalnym złačynstvie
Siońnia stała viadoma, pavodle jakoha artykuła abvinavačvajuć Darju Čulcovu. Apieratarku «Biełsata» zatrymali 15 listapada razam z Kaciarynaj Andrejevaj, jany pracavali nad strymam z płoščy Pieramienaŭ.
Darja Čulcova, taksama, jak i Kaciaryna Andrejeva, padazravanaja pavodle art. 342 (Dziejańni, jakija hruba parušajuć hramadski paradak). Pakarańnie pavodle hetaha artykuła praduhledžvaje štraf, abo aryšt, abo abmiežavańnie voli na termin da troch hadoŭ, abo pazbaŭleńnie voli na toj ža termin.
Ciapier Darja Čulcova, taksama jak i Kaciaryna Andrejeva znachodzicca ŭ žodzinskaj turmie.
Darja 15 listapada pracavała razam z Kaciarynaj Andrejevaj nad strymam z płoščy Pieramienaŭ, ich razam zatrymali, u adzin dzień sudzili pavodle administracyjnaj spravy.
Pravaabaroncy pryznali žurnalistak «Biełsata» palityčnymi źniavolenymi.
