Masavyja pieratrusy ŭ Biarozie, zatrymańni na Mazyrskim naftapierapracoŭčym. Ličba zatrymańniaŭ pa krainie ŭžo 29 940
Nie mienš za 59 čałaviek byli zatrymanyja ŭ Biełarusi ad paniadziełka da suboty pa palityčnych matyvach. Stolki imionaŭ viedajuć pravaabaroncy-viasnoŭcy.
Heta aznačaje, što ahulnaja ličba zatrymańniaŭ za čas pratestaŭ, pavodle ŭdakładnienych i dapoŭnienych źviestak, dasiahnuła 29 940 čałaviek.
Varta adznačyć, što hetyja ličby niapoŭnyja. Navat ahulnaja kolkaść ludziej, aryštavanych pa kryminalnych spravach pakul dakładna nieviadomyja, bo ich vielmi šmat. Na hety momant pravaabaroncy-viasnoŭcy viedajuć 523 čałavieki, jakija prachodziać pa kryminałkach — ad Siarhieja Cichanoŭskaha i Viktara Babaryki da žurnalistak Kaciaryny Barysievič i Kaciaryny Andrejevaj.
Čytajcie taksama: Chto takaja žurnalistka Kaciaryna Andrejeva? Raskazvajuć jaje muž i dziadula
Možna z dakładnaściu skazać, što heta samyja masavyja palityčnyja represii ŭ Jeŭropie za apošnija 40 hadoŭ.
Dla paraŭnańnia: kali b u praporcyi na dušu nasielnictva stolki ž ludziej zatrymali ŭ Rasii, heta skłała b 450 tysiač. Kali b va Ukrainie ci Polščy — 120 tysiač.
Izalatary časovaha ŭtrymańnia nastolki pierapoŭnienyja, što ŭ Minsku na minułym tydni niekatorych ludziej adpuskali paśla suda: u IČU prosta niama miescaŭ. Vyzvalenyja ludzi časta raskazvajuć, što ŭ typovaj kamiery ciapier na kožnyja nary prychodzicca pa dva čałavieki.
Čytajcie taksama: «Što łybišsia, bajcucha?» Kikbaksior Hanin raskazaŭ, jak jaho ŭdaryŭ achoŭnik žodzinskaha izalatara
Pieratrusy ŭ Biarozie
Hety tydzień adznačyŭsia masavymi pieratrusami ŭ Biarozie (Bresckaja vobłaść). Jak paviedamlajuć pravaabaroncy-viasnoŭcy, vobšuki źviazvajuć sa spravaj ab razmalavanym domie biarozaŭskaha milicyjanta Ivaniuka.
Adnak u toj ža čas u niekatorych ludziej padčas pieratrusaŭ pytalisia, što jany viedajuć pra ataki z kaktejlami Mołatava ŭ Biarozie i Baranavičach.
Pieratrusy prajšli ŭ samych roznych ludziej — ad chryścijanskich demakrataŭ da anarchistaŭ i futbolnych fanataŭ. Pravodzili pieratrusy supracoŭniki bresckaha adździeła HUBAZiK, piša Spring96.org.
Tak, kala 7-j ranicy 18 listapada ŭ Biarozie ź pieratrusam pryjšli da Vadzima Bilibuchi. U jaho kanfiskavali mabilny telefon, a zatym pavieźli ŭ RAUS. Taksama ź pieratrusam pryjšli da jahonaha baćki Valeryja Bilibuchi — aktyvista Chryścijanskaj demakratyi, deputata Pieršamajskaha sielsavieta. U jaho kanfiskavali noŭtbuk, paśla pieratrusu Valeryj byŭ zatrymany. Pa apošniaj infarmacyi, abodvuch pavieźli ŭ Baranavičy.
U domie Andreja Paškoviča byŭ kanfiskavany noŭtbuk, HUBAZiK pakazaŭ ordar na pošuk haručych sumiesiaŭ i zbroi.
Haručyja sumiesi šukali ŭ kvatery baćkoŭ Alaksandra Askirki. U vyniku ničoha kanfiskavana nie było, chłopca padčas pieratrusu ŭ Biarozie nie było.
U susiedniaj kvatery praviali pieratrus pa miescy prapiski Ihara Nielipoviča, jaki nie pražyvaje tam z 2017 hoda. Kvatera naležyć jaho baćkam, byŭ kanfiskavany telefon jaho maci.
U baćkoŭ Michaiła Pałoŭnikava pytalisia pra jaho miescaznachodžańnie, jak časta pryjazdžaje ŭ Biarozu i dzie pracuje.
Prajšoŭ pieratrus u Aleha Drazda. Supracoŭniki HUBAZiK cikavilisia. Taksama dapytvali Uładzimira Knyša.
Zatrymańni ŭ Mazyry
20 i 21 listapada ŭ Mazyrski RAUS vyklikali i potym adtul nie vypuścili sama mienš 8 čałaviek, paviedamlaje pravaabarončy sajt palesse.press.
Usie jany byli na fotazdymku za 27 kastryčnika, zroblenym niedaloka ad budynka zavoda.
Choć ich tvary byli zakrytyja, vyśvietlić asoby hetych ludziej, pavodle krynicy na MNPZ, dapamahło kiraŭnictva zavoda, pišuć pravaabaroncy.
Situacyja ŭ Mazyry pakazvaje, što ludziej sudziać užo za najmienšaje vykazvańnie palityčnaj pazicyi.
Zatrymanyja inžynier-technołah Vital Starušenka, technik uliku Taćciana Kazłovič, viadučyja inžyniery-technołahi Alaksandr Hančar, Michaił Kałodzieniec i Uładzimir Čuryła, a taksama inžynier-prahramist Alaksandr Žyhadła.
Taksama 20 listapada ŭ RAUS vyklikali žycharku Mazyra Alinu Jarachovič, jakaja prysutničała pobač ź miestam, dzie 15 listapada adbylisia zatrymańni ŭdzielnikaŭ akcyi pamiaci Ramana Bandarenki. Jaje taksama ź milicyi nie vypuścili. Pravaabaroncam viadoma pra jašče adnaho maładoha chłopca, jaki byŭ u RAUS 20 listapada i pakinuty tam na vychodnyja, ale jahonaje imia i proźvišča pakul vyśvietlić nie ŭdałosia.
21 listapada stała viadoma, što na paŭtorna zatrymany taksama inšy supracoŭnik naftapierapracoŭčaha zavoda, ekanamist Mikałaj Žłoba, choć jaho na fota niama. «9 nojabria jeho vypustili, jezdił na rabotu uznavať, na kakom osnovanii jeho uvolili zadnim čisłom. Nihdie bolšie nie učastvovał, i siehodnia k nimu domoj prišli iz ROVD mozyria i zabrali», — napisaŭ nam čytač «Našaj Nivy» sa Žłobina.
Varta adznačyć, što Mikałaja Žłobu i Taćcianu Kazłovič užo zatrymlivali 30 kastryčnika. Tady jany ranicaj pierad pačatkam pracoŭnaha času niekalki chvilin prastajali z płakatami kala prachadnoj MNPZ. 2 listapada namieśnica staršyni suda Mazyrskaha rajona Eleanora Jarmolenka pastanaviła aryštavać Žłobu na 10 sutak, a Kazłovič aštrafavać na maksimalna mahčymyja 30 bazavych vieličyniaŭ.
Ahulnaja kolkaść zvolnienych za palityku dasiahnuła ŭ krainie niekalkich socień čałaviek. Dakładnaja ličba pakul nieviadomaja. Tak, tolki na «Biełaruśkalii» zvolnienyja jak minimum 49 čałaviek. Jašče niekalki socień studentaŭ adličana.
Čytajcie taksama: «Ja viadučy navukovy supracoŭnik, kažu. A milicyjantka nie razumieje: «A možna po-russki?». Navukoviec Aleś Žłutka raskazaŭ pra sud i źniavoleńnie
