«Pryniaŭ aktyŭny ŭdzieł». Milicyja dasłała pratakoł pa 23.34 minčuku, jaki pamior siem hadoŭ tamu
Minskaja milicyja dasłała kopiju pratakoła pa 23.34 KaAP na imia i adras čałavieka, jaki pamior siem hadoŭ tamu. «Pratakoł pračytała mama, jana vielmi źniervavałasia», — paviedamiŭ Tut.by svajak niabožčyka.
Mitynh u Minsku 13 vieraśnia. Fota Tut.by
Dziŭnuju papieru ź Pieršamajskaha RUUS Minska žychary adnoj z kvater u domie 34 pa vulicy Cikockaha vyjavili ŭ paštovaj skryni ŭ pačatku listapada.
— Heta kopija pratakoła, tam napisana, što Mielnikaŭ Alaksandr Jafimavič 13 vieraśnia ŭziaŭ aktyŭny ŭdzieł u niedazvolenym mitynhu. Tak klikali majho baćku, i jon sapraŭdy žyŭ pa hetym adrasie, — raspavioŭ Anton Mielnikaŭ, syn niabožčyka. — Pratakoł pryjšoŭ na adras baćkoŭ, jaho pračytała mama. Vielmi źniervavałasia, bo heta nie najlepšy sposab paminać blizkaha čałavieka.
Mielnikava Alaksandra Jafimoviča sprabavali prainfarmavać, što jon parušyŭ Zakon «Ab masavych mierapryjemstvach» i ŭ dačynieńni da jaho viaduć administracyjny praces pavodle artykuła 23.34 KaAP.
— U pratakole paznačany asabisty numar pravaparušalnika, ale my nie viedajem, ci baćkoŭski, bo pašparta nie zastałosia. Telefon pakazany čamuści moj — toj, jakim ja bolš nie karystajusia. Mocna nie supadaje tolki data: Mielnikaŭ Alaksandr Jafimavič pa pratakole naradziŭsia ŭ 1978-m, choć naš baćka — u 1945-m.
U 1978-m nie naradziŭsia taksama nivodzin z dvuch synoŭ Alaksandra.
Siamja padała ŭ redakcyju kopiju paśviedčańnia ab śmierci svajho svajaka. U Pieršamajskaje RUUS źviartacca nie stali.
— Mieć znosiny ź milicyjaj niama žadańnia, jość žadańnie tolki znajści mocnaha miedyuma i padziakavać baćku za jaho hramadzianskuju pazicyju. Byŭ by jon žyvy, napeŭna dva śviedki badziora śćviardžali b, što bačyli mienavita jaho, mienavita ŭ tym miescy i ŭ toj čas. Baćku pašancavała z alibi, — iranizuje minčuk.
Što kažuć u milicyi
— Techničnaja pamyłka. Sprava ŭ tym, što z takimi imiem, proźviščam i imiem pa baćku jość niekalki čałaviek. Pamyłkova vysłali kopiju pratakoła inšamu, — patłumačyła aficyjny pradstaŭnik HUUS Minharvykankama Natalla Hanusievič. — My vielmi prosim prabačeńnia pierad svajakami za dastaŭlenyja niazručnaści, ale heta adzinkavy vypadak.
Hod tamu Tut.by raspaviadaŭ historyju pra minčanku, jakaja zahinuła ŭ ciskaninie na stancyi «Niamiha» ŭ 1999-m, ale apynułasia ŭ bazie darmajedaŭ. Baćki dziaŭčyny raspaviadali pravaabaroncu, što na praciahu dvaccaci hadoŭ im prychodzili i inšyja listy na imia zahinułaj-to z vykankama, to z orhanaŭ unutranych spraŭ.
