Zdała susiedka. Žychar Žłobina atrymaŭ 3 miesiacy aryštu za «cyničnyja nadpisy» na asfalcie
Ilustracyjnaje fota
19 listapada ŭ Žłobinie sudzili 34-hadovaha Dzianisa. Jon u vieraśni pakinuŭ na asfalcie i słupach «cyničnyja nadpisy», za jakija atrymaŭ kryminalny pieraśled pavodle artykuła 341 Kryminalnaha kodeksa («Vandalizm»). Cyničnymi pryznanyja, siarod inšych, nadpisy «3%» i «Žyvie Biełaruś!», piša Radyjo Svaboda.
Pa viersii abvinavačańnia, svaim učynkam žłobiniec chacieŭ «prajavić demanstratyŭnuju niepavahu da hramadstva i čužoj ułasnaści».
«Na sudzie prahučała, što ŭ toj viečar Dzianis byŭ napadpitku. Jon i sam heta pryznaje. Jaho «zdała» susiedka, jakaja bačyła, jak jon piša. Jana i vyklikała milicyju. Kali Dzianisa zabrali, jahonyja baćki sami zafarbavali tyja nadpisy. Tam było «Łuka 3%», «Žyvie Biełaruś» i jašče niešta z užyvańniem niecenzurnaj leksiki», — paviedamiŭ žychar Žłobina, jaki prysutničaŭ na sudzie.
Abvinavačany pryznaŭ svaju vinu i raskajaŭsia. Jon zaznačyŭ, što kali b nie vypiŭ u toj viečar, to naŭrad ci pajšoŭ by pisać na słupach i asfalcie.
Advakat prasiŭ nie pazbaŭlać padabaronnaha voli, bo złačynstva nie źjaŭlajecca ciažkim, nie źjaŭlajecca niebiaśpiečnym dla hramadstva, nie pryniesła faktyčna nikomu škody, aproč samoha abvinavačanaha. Abaronca vykazaŭsia, što štraf budzie adekvatnym pakarańniem dla žychara Žłobina.
Sud ža pastanaviŭ aryštavać jaho na try miesiacy.
