Tempieratura nie mienš za 18 hradusaŭ: zaćvierdžany kryteryi jakaści pasłuh ŽKH
Kryteryi jakaści žyllova-kamunalnych pasłuh vyznačany ŭ Biełarusi. Adpaviednaja pastanova ŭrada apublikavana siońnia na Nacyjanalnym pravavym internet-partale, piša BiełTA.
Dla techničnaha i sanitarnaha absłuhoŭvańnia kryteryjem jakaści źjaŭlajecca bieśpierabojnaje funkcyjanavańnie inžyniernych sistem, spraŭnaść kanstruktyŭnych elemientaŭ budynkaŭ, svoječasovaje ŭstaranieńnie niaspraŭnaściej, a taksama adsutnaść pretenzij ad spažyŭcoŭ. Što datyčycca kapitalnaha ramontu, to kryteryjami jaho jakaści nazvany zachavańnie etapaŭ płanavańnia i arhanizacyi kapramontu, terminaŭ i hrafikaŭ rabot, adsutnaść pretenzij spažyŭcoŭ.
Dla techničnaha absłuhoŭvańnia liftaŭ kryteryjami źjaŭlajucca bieśpierabojnaja i biaśpiečnaja rabota, vyzvaleńnie pasažyraŭ z kabiny lifta na praciahu 15 chvilin z momantu pastupleńnia vykliku pry ŭźniknieńni avaryjnaj situacyi.
Ćviordyja kamunalnyja adchody, zhodna z zaćvierdžanymi kryteryjami, pavinny vyvozicca ŭ adpaviednaści ź pieryjadyčnaściu, ustanoŭlenaj schiemaj. Druhasnyja materyjalnyja resursy pavinny pierapracoŭvacca pa isnujučych technałohijach.
Kryteryj jakasnaha absłuhoŭvańnia zaporna-pierahavornych ustrojstvaŭ i sistem videanahladu — ich bieśpierabojnaja rabota, a dla videanahladu jašče i mahčymaść zachoŭvańnia danych u sistemie nie mienš za 72 hadziny.
Dla vodazabieśpiačeńnia vyznačany normy zabieśpiačeńnia vadoj nie mienš za 140 ł u sutki na čałavieka, u tym liku 70 ł u sutki haračaj vady. Tempieratura haračaj vady pavinna być nie mienšaj za +50 hradusaŭ, ale nie bolšaj za +75. Akramia taho, jakaść pitnoj vady pavinna adpaviadać sanitarnym praviłam i normam.
Što datyčycca vodaadviadzieńnia, to kryteryj jaho jakaści — kruhłasutačny i pastajanny pryjom ściokavych vod u centralizavanuju sistemu kanalizacyi. Pierapynki mohuć być nie bolšymi za 24 hadziny pry likvidacyi avaryj.
Tempieratura pavietra ŭ žyłych pamiaškańniach pavinna być nie mienšaj za +18 hradusaŭ, ale nie bolšaj za +24. Dla hazazabieśpiačeńnia kryteryjem vyznačana bieśpierabojnaja padača hazu, a dla elektrazabieśpiačeńnia — bieśpierabojnaja padača napružańnia 230/240 V u miežach normy adchileńnia plus/minus 10 pracentaŭ ad napružańnia 230/400 V.