Minčuka asudzili na 3 hady kałonii za «napad na amapaŭca» 14 lipienia na Niamizie
Zatrymańnie 14 lipienia na Niamizie Antona Łakišyka ŭ biełaj kofcie. Załamaŭšy Antonu ruku, sprava jaho viadzie amapaviec Jaŭhien Dudkin — u sudzie paciarpieły. Fota: spring96.org
Sud Centralnaha rajona 17 listapada asudziŭ 21-hadovaha technika Antona Łakišyka za napad na amapaŭca Jaŭhiena Dudkina 14 lipienia na Niamizie da troch hadoŭ kałonii. Sudździa Viktoryja Šabunia pryznała minčanina vinavatym pa artykule 364 KK (hvałt u dačynieńni da supracoŭnika AMAPa), paviedamlaje spring96.org.
Niahledziačy na toje, što supracoŭnik minskaha AMAPa paśla patasoŭki z Antonam nie atrymaŭ cialesnych paškodžańniaŭ i nie źviartaŭsia ŭ miedycynskija ŭstanovy, jamu kampiensavanaja maralnaja škoda ŭ tysiaču rubloŭ, chłopiec całkam pryznaŭ svaju vinu, jamu pryznačyli toje pakarańnie, jakoje prasiŭ prakuror.
Chłopiec ustupiŭ u patasoŭku z amapaŭcam, kali tyja pačali vychoplivać i zatrymlivać pratestoŭcaŭ, što stali ŭ sčepku. Antona Łakišyka aryštavali ŭ zale suda.
21-hadovaha Antona Łakišyka zatrymali 14 lipienia kala mietro «Niamiha». U toj viečar minčuki vyjšli na stychijnyja akcyi ŭ znak pratestu suprać nierehistracyi ŭ jakaści kandydataŭ u prezidenty Viktara Babaryku i Valeryja Capkału. U niekatorych punktach horada naziralisia žorstkija sutyknieńni ź siłavikami.
U toj viečar Antona pratrymali niekalki hadzin u RUUS Centralnaha rajona i adpuścili. Na jaho skłali pratakoł pa artykule 23.34 KaAP (udzieł u niesankcyjanavanym masavym mierapryjemstvie). Sud nad im pavinien byŭ pačacca 28 lipienia ŭ sudzie Maskoŭskaha rajona Minska, ale jon byŭ pieraniesieny na niavyznačany termin. Na chłopca raspačali kryminalnuju spravu za hvałt u dačynieńni da supracoŭnika AMAPa pa artykule 364 Kryminalnaha kodeksa.
Antona paŭtorna zatrymali 23 lipienia na pracy, tolki ŭžo ŭ miežach kryminalnaj spravy. Adrazu abrali mieru strymańnia — utrymańnie pad vartaj. 21-hadovy chłopiec prabyŭ u SIZA №1 u Minsku kala dvuch miesiacaŭ — da 8 vieraśnia. Antona vypuścili na volu, źmianiŭšy jamu strymańnia na padpisku ab niavyjeździe. U sud Anton prychodziŭ samastojna.
Što było na sudzie?
Supracoŭnik AMAPa Jaŭhien Dudkin na sudzie adznačyŭ, što fizičnych pakut jon nie panios, cialesnych paškodžańniaŭ nie było, u miedycynskuju ŭstanovu nie źviartaŭsia ŭ suviazi ź niaznačnaściu hetych paškodžańniaŭ. Pry hetym svaje maralnyja pakuty ad hetych udaraŭ acaniŭ u 1000 rubloŭ.
Anton u sudzie całkam pryznaŭ vinu i ŭžo paśpieŭ pakryć maralnuju škodu supracoŭniku AMAPa — 1000 rubloŭ, kab źmiakčyć pakarańnie.
Na sudzie Anton Łakišyk patłumačyŭ, što ŭ samym niesankcyjanavanym mierapryjemstvie 14 lipienia ŭdzieł nie prymaŭ, a naziraŭ z boku. Jon bačyŭ, jak da ŭdzielnikaŭ akcyi pratestu padyšli supracoŭniki milicyi, paśla čaho pieršyja pačali ŭstavać u sčepku, a siłaviki pačali ich zatrymlivać, u tym liku z užyvańniem siły.
Na sudovym pracesie Anton Łakišyk adznačyŭ, što znachodziŭsia ŭ toj momant u stanie vielmi mocnaha chvalavańnia, «hetyja padziei jaho aburyli». Jon pačuŭ, jak u natoŭpie niechta kryknuŭ «Napierad!» — Anton uspryniaŭ heta jak zaklik da nastupu da supracoŭnikaŭ milicyi. Sa słoŭ Antona, jon paddaŭsia emacyjnamu paryvu i chacieŭ dapamahčy pratestoŭcu, jakoha pačali zatrymlivać. Jon šturchnuŭ supracoŭnika AMAPa ŭ śpinu, udaryŭ jaho nahoj u pravuju nahu i rukoj u hrudzi. Paśla hetaha da Antona Łakišyka «była ŭžytaja fizičnaja siła i jon byŭ zatrymany».
Da kryminalnaj i administracyjnaj adkaznaści 21-hadovy chłopiec raniej nie pryciahvaŭsia. Pry hetym dziaržaŭny abvinavaŭca paprasiŭ sudździu pakarać Antona Łakišyka pa artykule 364 Kryminalnaha kodeksa tryma hadami pazbaŭleńnia voli z adbyvańniem pakarańnia ŭ kałonii ahulnaha režymu.
Sam Anton, jaho blizkija i abarona chłopca byli šakavanyja takoj surovaj prapanovaj prakurora, uličvajučy nazvanyja źmiakčalnyja abstaviny. Sam paciarpieły supracoŭnik AMAPa zhadžaŭsia z abaroncaj u sudzie, jakaja chadajničała vyzvalić Antona ad kryminalnaj adkaznaści z pryciahnieńniem jaho da administracyjnaj adkaznaści. U sudovych sprečkach paciarpieły supracoŭnik AMAPa Jaŭhien Dudkin adznačyŭ, što «asabista ŭ jaho da Łakišyka niepryjaznaści niama, jon vykonvaŭ svaju pracu». Prasiŭ sud pakarać Antona na «jaho mierkavańnie», ale paprasiŭ pry pryznačeńni pakarańnia Antonu «ŭličyć uzrost i ŭpłyŭ ekstremisckich telehram-kanałaŭ».
Sudździa Viktoryja Šabunia nie ŭličyła pažadańni navat paciarpiełaha amapaŭca i pakarała jaho tak, jak prasiŭ prakuror. Sud Centralnaha rajona asudziŭ Antona Łakišyka 18 listapada da troch hadoŭ pazbaŭleńnia voli z adbyvańniem pakarańnia ŭ kałonii ahulnaha režymu.
