NAU: Sapraŭdnaja kolkaść zatrymanych u krainie pieravysiła 27 tysiač čałaviek
Zatrymańnie ŭ Minsku. Fota Nadziei Bužan
Nacyjanalnaje antykryzisnaje ŭpraŭleńnie zajaviła, što atrymała ŭ rasparadžeńnie ŭnutrany dakumient Ministerstva ŭnutranych spraŭ. Ź jaho vynikaje, što aficyjna raspaŭsiudžanyja źviestki pra kolkaść zatrymanych zanižanyja.
Zhodna z dakumientam, z 9 žniŭnia i da 3 listapada ŭ Biełarusi zatrymali bolš za 25 800 čałaviek za «parušeńnie zakanadaŭstva ab masavych mierapryjemstvach i ŭčynieńnie inšych pravaparušeńniaŭ pry ich praviadzieńni». Za hety ž čas supracoŭniki skłali bolš za 24 tysiačy administracyjnych pratakołaŭ.
Pavodle źviestak spravazdačy, z dnia vybaraŭ biełarusy padali ŭ orhany 4000 zajaŭ ab hvałcie z boku supracoŭnikaŭ siłavych struktur.
Kali hetyja ličby praŭdzivyja, to, z ulikam zatrymanych za 4-13 listapada, kolkaść zatrymanych u Biełarusi pieravysiła 27 tysiač.
Raniej mierkavałasia, što ŭ krainie adbyłosia kala 18 tysiač zatrymańniaŭ. Hetaja ličba hruntavałasia na śpisach imion zatrymanych, jakija viaduć pravaabaroncy-viasnoŭcy, a taksama na źviestkach MUS za asobnyja dni. Pravaabaroncy pryznajuć, što hety śpisy mohuć być niapoŭnyja, bo nie ŭsie zatrymanyja paviedamlajuć pra siabie pravaabaroncam ci ŭ ŚMI.
«Naša Niva» źviarnułasia da NAU z prośbaj raspaŭsiudzić kopiju dakumienta. Nam adkazali, što heta, mahčyma, budzie zroblena, ale pakul mahło b pastavić pad pahrozu krynicu, jakaja pieradała dakumient.
