Paśla daručeńnia Łukašenki «razabracca» łabaratoryja Synevo prypyniaje teściravańnie na «karonu»
Z 16 listapada łabaratoryja «Sineva» časova nie budzie akazvać pasłuhi pa PCR-testavańni na karanavirus. Hetuju infarmacyju paćvierdzili ŭ łabaratoryi TUT.BY.
U siami łabaratoryjach «Sineva» ź siaredziny kastryčnika možna było zdać test PCR na karanavirus. Miarkujučy pa čerhach pierad łabaratoryjami, popyt na pasłuhu byŭ vialiki. Adnak «pa techničnych pryčynach» z paniadziełka, 16 listapada, hetaja pasłuha akazvacca nie budzie, paviedamili ŭ łabaratoryi. Tut kažuć, što prypynieńnie časovaje, kali adnovicca testavańnie — pakul nie viadoma.
Nahadajem, na naradzie 5 listapada Alaksandr Łukašenka aburaŭsia tym, što ŭ niekatorych łabaratoryjach košt daśledavańniaŭ na COVID-19 dachodzić «da 300 rubloŭ za adzin test», a ludzi biahuć u hetyja łabaratoryi i «psichoz stvarajuć u hramadstvie». Jon daručyŭ «da paniadziełka» — to-bok 9 listapada — z hetym razabracca.
Łukašenka zajaviŭ, što testavańnie na karanavirus pavinna prachodzić u tych łabaratoryjach, jakija vyznačyć Ministerstva achovy zdaroŭja, a kali pryvatnyja łabaratoryi zachočuć «dapamahčy dziaržavie», to na «dziaržaŭnych umovach».
— A to ŭ nas užo niekatoryja razumniki zakupili niejkaje abstalavańnie i pačynajuć škuru drać ź ludziej. Psichoz stvarajuć u hramadstvie. Biahuć u hetyja łabaratoryi, i da 300 rubloŭ dachodzić adzin test. Kali chtości z pryvatnych łabaratoryj choča dapamahčy dziaržavie — na dziaržaŭnych umovach.
Nasamreč PRC-test u pryvatnaj łabaratoryi «Sineva» kaštavaŭ 63,01 rubla.
