Z homielskaj tubierkuloznaj balnicy zvolnili doktara, jaki adsiadzieŭ 15 sutak za płakat «Žyvie Biełaruś»
11 listapada z Homielskaj abłasnoj balnicy zvolnili doktara-ftyzijatra Mikałaja Koziča. 26 kastryčnika jon vyjšaŭ da balnicy z płakatam «Žyvie Biełaruś» i atrymaŭ 15 dzion aryštu, piša «Radyjo Svaboda».
«Siońnia pieršy dzień na pracy paśla «sutak». Vyklikali ŭ adździeł kadraŭ i ŭručyli pracoŭnuju knižku», — paviedamiŭ Mikałaj Kozič.
Jon małady śpiecyjalist, adpracoŭvaŭ biaspłatnuju adukacyju ŭ suchotnaj balnicy. Aproč pracy pa śpiecyjalnaści — ftyzijatryja — braŭ dziažurstva ŭ pulmanałohii. U žniŭni ŭ Mikałaja pačaŭsia druhi hod adpracoŭki. U vieraśni jon byŭ u haściach u baćkoŭ u Žłobinie i trapiŭ pad zatrymańnie paśla akcyi pratestu. Tady Mikałaj adsiadzieŭ vosiem dzion u žłobinskim IČU. Razam ź im zatrymali jahonych maci, žonku, siastru i muža siastry. Žančyny atrymali štrafy, mužčyny — pa vosiem sutak.
«Ciapier ja razvažaju, kudy mnie padacca, dzie znajści pracu. U adździele kadraŭ mnie pakazali dźvie vymovy, jakija ja «atrymaŭ», pakul siadzieŭ na «sutkach», i zahad na zvalnieńnie. Vymovy — mietadyčna šukali, da čaho pryčapicca, pakul ja siadzieŭ. I znajšli — analiz kryvi, naprykład, pryznačyŭ nie ja, a zahadčyca adździaleńnia, i tak dalej. U zahadzie na zvalnieńnie paznačyli, što za nievykanańnie pracoŭnych abaviazkaŭ. Jašče da zvalnieńnia i «sutak» da mianie była pilnaja ŭvaha za maju hramadzianskuju pazicyju. Načalstva pierad vychodnymi cikaviłasia, što ja źbirajusia rabić u niadzielu (majucca na ŭvazie akcyi pratestu). Paśla pytalisia, jak prajšli maje vychodnyja», — zaznačyŭ doktar.
Suchotnaja balnica — adzinaja ŭ Homieli, jakaja nie viartałasia paśla pieršaj chvali COVID-19 da «narmalnaha žyćcia». Tut praciahvali ŭvieś čas lačyć ludziej z karanavirusam. «Ciapier taksama pacyjentaŭ z COVID-19 dastatkova», — dadaŭ Mikałaj Kozič.
