Kačanava pra pratesty miedykaŭ: Heta vielmi drenna! Heta ni da čaho dobraha nie pryviadzie
Staršynia Savieta Respubliki Nacyjanalnaha schodu Biełarusi Natalla Kačanava praviała naradu z kiraŭnikami miedustanoŭ. Jana tyčyłasia nie tolki pytańniaŭ zmahańnia z karanavirusnaj infiekcyjaj, ale i ideałohii. Aŭdyjozapis sa schodu raźmiaścili ŭ telehram-kanale «Biełyja chałaty».
U svajoj emacyjnaj pramovie Natalla Kačanava vykazała ździŭleńnie tym faktam, što miedyki vychodziać na akcyi pratestu i salidarnaści z zatrymanymi raniej kalehami.
— Siońnia, kali jość u kahości takaja nieabchodnaść, pracujuć dyjałohavyja placoŭki. Kali jość niejkaja patreba: ustanova vaša, univiersitet, paliklinika, balnica, chacieli b sustrecca z kim-niebudź z kiraŭnikoŭ abo vyšejšych słužbovych asob, kiraŭnictva krainy — my hatovyja sustrecca z vašymi kalektyvami. Dyjałohu na vulicach nie budzie — papiaredźcie ich, — cytuje Kačanavu Tut.by. — Kali chto-niebudź choča vykazać svajo mierkavańnie, kali łaska, my hatovyja da dyjałohu. Ale nie ŭ farmacie hetych vychadaŭ i pratestaŭ! Heta vielmi drenna! Heta ni da čaho dobraha nie pryviadzie.
Kačanava padkreśliła, što kali kiraŭnictvu ŭstanoŭ achovy zdaroŭja nie ŭdajecca vyrašyć pytańni sa svaimi padnačalenymi, to jana hatovaja pryjechać sama, a taksama kiraŭnictva Ministerstva achovy zdaroŭja.
— Ale na vulicy my nie pojdziem ź imi razmaŭlać. My hatovyja da dyjałohu, ale jon pavinien być cyvilizavanym, — zajaviła Kačanava.
— Voś prosta tak, vykazvać svajo pratesnaje mierkavańnie, vychodziačy čamuści na vulicy, niezrazumieła dla čaho… ja jašče razumieju, my sustrakajemsia sa studentami, razmaŭlajem ź imi, ale kali darosłyja ludzi zajmajucca hetym, na moj pohlad, heta niapravilna, — vykazała jana svajo mierkavańnie.
Jana taksama prakamientavała zatrymańni miedykaŭ padčas akcyj salidarnaści.
— [Zatrymlivajuć] nie za pierakanańni, jany ŭ kožnaha mohuć być svaje, za parušeńni zakonu! Kali ludzi vychodziać na niesankcyjanavanyja mierapryjemstvy i parušajuć hramadski paradak. Voś za što ich pryciahvajuć da adkaznaści. I buduć pryciahvać nadalej, my pravavaja dziaržava, dzie dziejničajuć zakony. I vykanańnie zakonaŭ abaviazkovaje dla ŭsich. Nie treba ładzić verchał! Usie hetyja mirnyja akcyi ni da čaho dobraha nie pryvodziać, — ličyć Kačanava.
Jana paraiła kiraŭnikam razmaŭlać ź ludźmi, pakolki toje, što adbyvajecca, «nie ŭpryhožvaje sistemu achovy zdaroŭja», a taksama adznačyła, što «kiraŭnik = ideołah».
Natalla Kačanava taksama papraknuła kiraŭnictva Biełaruskaha prafsajuza rabotnikaŭ achovy zdaroŭja.
— Kali ludzi vychodziać z arhanizacyi, značyć, vy nie dapracoŭvajecie. Uklučajciesia ŭ pracu vielmi aktyŭna, prajedźcie, pahavarycie ź ludźmi, u vas ža jość razhalinavanaja sietka prafsajuznych aktyvistaŭ.
U zaviaršeńnie Natalla Kačanava vykazała svajo mierkavańnie: «Tak, jak robiać miedyki ciapier časam, — heta pa mienšaj miery dziŭna».
Ad 9 žniŭnia ŭ Biełarusi praciahvajucca akcyi pratestu. Aktyŭny ŭdzieł u ich biaruć i miedyki — heta pačałosia paśla taho, jak u balnicy stali pastupać ludzi, paciarpiełyja ad hvałtu siłavikoŭ. Kali miedykaŭ stali zatrymlivać, ich kalehi praciahnuli vychodzić — ale ŭžo na akcyi salidarnaści. U subotu, 7 listapada, nahadajem, niekalki dziasiatkaŭ miedykaŭ byli schoplenyja na pratesnaj akcyi kala 1-j balnicy ŭ centry Minska. 9 listapada sudzili bolš za 10 ź ich. Viadomych miedykaŭ, jakich niama kim zamianić, adpravili na «sutki». 10 listapada sudovy kanviejer praciahnuŭ svaju pracu — daktaroŭ sa šmathadovym stažam adpravili adbyvać 12-15 sutak aryštu.