Eduard Babaryka napisaŭ ź SIZA KDB, što redka atrymlivaje listy i dva tydni pravioŭ u adzinočcy
Z 18 červienia Eduard Babaryka, syn udzielnika prezidenckaj kampanii Viktara Babaryki i kiraŭnik jaho inicyjatyŭnaj hrupy, znachodzicca ŭ SIZA KDB i da hetaha času pazbaŭleny mahčymaści vieści paŭnavartasnuju pierapisku sa źniešnim śvietam.
«Za 4,5 miesiaca źniavoleńnia da mianie dajšli listy tolki ad niekalkich čałaviek. Pastajannuju pierapisku atrymałasia ŭstalavać tolki sa svajakami i paračkaj siabroŭ. U astatnich ź niejkaj zahadkavaj pryčyny tak i nie atrymałasia «prarvacca», — napisaŭ Eduard u adkaz na list svajoj kalehi i siabra Volhi Mželskaj.
List ź SIZA byŭ adpraŭleny 5 listapada. Volha padzialiłasia vytrymkami z redakcyjaj Reform.by.
Jon napisaŭ, što na dadzieny momant znachodzicca ŭ kamiery z adnym susiedam i redka byvaje na špacyrach.
«Hulać, hulać, hulać i razmaŭlać. Šmat razmaŭlać:) Tut, z špacyrami i razmovami prablemy. Užo miesiac znachodžusia ŭ kamiery z adnym čałaviekam. Naohuł, ja ź im usie 4,5 miesiaca. Ale ciapier my ŭ maleńkaj kamiery ŭdvaich, a da hetaha žyli ŭtroch. Maksimum nas było 5 čałaviek. Heta ja da taho, što znosiny tut vielmi abmiežavanyja i my časam adzin adnamu nadakučajem. Voś paru dzion tamu paspračalisia. I amal dva dni praviali ŭ maŭčańni:) Ničoha strašnaha, ale paciešnaja sama situacyja», — apisvaje svaje budni palitviazień.
Eduard Babaryka paviedamiŭ, što paŭtara miesiaca tamu jaho pa nieviadomaj pryčynie adpravili ŭ adzinočku, dzie jon pravioŭ dva tydni.
«Jašče 1,5 miesiaca tamu mianie čamuści sasłali ŭ adzinočnuju kamieru, dzie ja pravioŭ 2 tydni. Z ranicy da nočy malavaŭ i čytaŭ. Potym, pa viartańni da susiedziaŭ, nie moh nahavarycca:)», — žartuje jon.
Syn Viktara Babaryka zapeŭnivaje, što pačuvajecca dobra, choć umovy ŭtrymańnia nazyvaje žudasnymi.
«U mianie ŭsio dobra! Psichałahična, mientalna i fizična — poŭny paradak. Žachaje, što ludzi ŭ XXI st. mohuć utrymlivacca ŭ takich umovach. Ale ŭpeŭnieny, što Biełarusi zastałosia jašče krychu paciarpieć — dalej budzie tolki lepš. Apošni miesiac prahłynaju knihi adnu za adnoj. Da hetaha čarhavaŭ čytańnie, šachmaty, malavańnie, johu, miedytacyju, praktykavańni. A apošni miesiac čamuści mahu tolki čytać. Dziŭna:)», — padzialiŭsia svaimi ŭražańniami palitviazień, list jakoha prajšoŭ praź sita cenzury.
Viktara i Eduarda Babarykaŭ zatrymali ranicaj 18 červienia 2020 hoda, kali jany adpravilisia zdavać podpisy ŭ vybarčuju kamisiju. Ich abvinavačvajuć u ekanamičnych złačynstvach. Pravaabaroncy i biełaruskaje hramadstva ličać pieraśled Viktara i Eduarda Babarykaŭ palityčna matyvavanym. Viktar Babaryka źjaŭlaŭsia asnoŭnym kankurentam Alaksandra Łukašenki na vybarach. Eduard prysutničaŭ na našumiełaj sustrečy Łukašenki z palityčnymi źniavolenymi ŭ SIZA KDB.
