Alena Leŭčanka: Nie chočam być Paŭnočnaj Karejaj
«Na praciahu ŭžo doŭhaha času mnohija, u tym liku i našy viadomyja spartsmieny, lubiać vielmi časta vykarystoŭvać słohan «ja — za mir», — piša ŭ fejsbuku zorka biełaruskaha baskietboła Alena Leŭčanka, jakaja niadaŭna adbyła termin na Akreścina za ŭdzieł u akcyi pratestu.
— Mnie cikava: za jaki mienavita vy mir? Za toj, jaki ŭ Paŭnočnaj Karei? Tam ža taksama «mir». Ci za mir, u jakim nie parušajucca pravy čałavieka, jość svaboda słova i dumki?
Sapraŭdnaha «miru» ŭ našaj krainie niama daŭno. Z dnia vybaraŭ prajšło 93 dni, i kazać «za mir» prosta, kab pastavić hałačku i adznačycca — heta ŭžo tak nie pracuje. Para b nazyvać rečy svaimi imionami. Čas być ščyrym chacia b z saboj.
My imkniomsia da krainy, u jakoj majuć prava być roznyja mierkavańni, i za heta nie buduć karać, pahražać, źbivać abo sadzić u turmu. Tamu chaj heta budzie inšaje mierkavańnie, ale dakładnaje, jasnaje i zrazumiełaje — vaša asabistaje, a nie niejki abciakalny amorfny «mir». Bo kali vy hulajecie ŭ hulni, siadzicie na dvuch kresłach, kažacie ničoha nie paviedamlajučy — vy chłusicie. A moža prosta kankretyka praduhledžvaje adkaznaść za svaje słovy?
«Vy zabrali ŭ nas svabodu»: Alena Leŭčanka raspaviała pra katavańni na Akreścina, znachodžańnie biez matraca, haračaj vady i kanalizacyi VIDEA
A maim biełarusam, jakija dakładna razumiejuć i viedajuć, da jakoha miru imknucca, jakija kožny dzień, niahledziačy na cisk, vychodziać «hulać» i ryzykujuć, skidajucca hrašyma, dapamahajuć, strajkujuć, biehajuć va ŭsiu moc, ja chaču skazać: vy sapraŭdnyja hieroi, vy natchniajecie! U žyćci, jak u hulni, byvajuć ŭźloty i padzieńni, ale jość Siła, Vola, Duch i Adzinstva, jakija siońnia prysutničajuć u kožnym z nas i ŭ samuju ciažkuju chvilinu dapamahajuć ruchacca dalej — da pieramohi.
Nikoli nie viercie svaim stracham — jany nie viedajuć vašaj siły!
Vy nikoli nie daviedajeciesia, nakolki vy mocnyja, pakul być mocnym — heta vaš adziny vybar! Pamiatajcie, navat u samuju ciomnuju noč źziajuć samyja jarkija zorki, maje niezvyčajnyja biełarusy», — napisała Alena Leŭčanka.
