«Dali rułon tualetnaj papiery na šaściarych. A paśla zahadali admatać dla susiedziaŭ», — 50-hadovaja supracoŭnica Ruskaha teatra zhadvaje noč na Akreścina
50-hadovaja Łarysa Kalinoŭskaja, jakaja kiruje rekłamna-markietynhavym adździełam teatra imia Horkaha, pajšła na «Marš narodaŭładździa» razam ź siabroŭkaj. Udała paźbiehła zatrymańnia la Steły, ale adyšoŭšy ad płoščy Pieramohi, dzie dałučyłasia da Niny Bahinskaj, apynułasia ŭ busiku siłavikoŭ. Vynik — noč na Akreścina i dvaccać piać bazavych ad sudździ Anastasii Lajkoŭskaj.
«Ad Steły my pajšli pa praśpiekcie Mašerava: bałazie my žančyny, tamu nas prapuścili, bo mužykoŭ nie vypuskali. My stali błukać, kab da niekaha dałučycca, ale paŭsiul było šmat busaŭ i aŭtazakaŭ, i ludzi prosta nie mahli sabracca. My ŭbačyli Ninu Bahinskuju i pajšli da jaje. Kałona była nievialikaja, ale joj machali z voknaŭ i sihnalili mašyny. Užo la Akademii MUS padjechali busy, ź ich pavyłazili hetyja monstry i pieraharadzili nam darohu. U nas ź siabroŭkaj nie było nijakaj simvoliki, my ŭvohule — ciotački ŭ rajonie piacidziesiaci. My paprasili, kab nam dali prajści, a nam adkazali: «Nie, vy projdziecie voś siudy», — i paviali ŭ bus».
Jechać u busiku daviałosia doŭha: Łarysa pačuła kamandu pa racyi zajechać «papracavać» u adnym internacie, bo jaho vachciorka paviedamiła, što ŭ budynak zabiehli pratestoŭcy. Paśla zatrymanych pierasadzili ŭ zapoŭnieny aŭtazak, dzie ŭ adnamiesnym «stakanie» daviałosia jechać utroch.
«Adnu žančynu kala piacidziesiaci, padobna, źbili. Jaje ruki byli źviazanyja płastykavaj ściažkaj, jana płakała, a ŭ «stakanie» ŭ jaje zdaryłasia isteryka. Pry hetym nam staralisia ŭdacca vietlivymi: kazali, što «nas treba bierahčy», maŭlaŭ, kali b my byli mužykami, z nami b razmaŭlali inakš. U dvary Pieršamajskaha RUUSa nas pastavili tvaram da ściany».
Łarysa kaža, što z mužčynami sapraŭdy abychodzilisia žorstka, va ŭsich ruki byli źviazanyja płastykavaj ściažkaj, adnamu za niejkuju pravinu zahadali lehčy na chałodnuju plitku. Jašče kali pierasadžvalisia z busa ŭ aŭtazak, ubačyła dvuch chłopcaŭ ź mietkami čyrvonaj farbaj na iłbie. Zrešty, była i dziaŭčyna, jakuju, jak stała viadoma paźniej u razmovie, pry zatrymańni taksama źbili.
«Kali padvozili jašče ludziej, u hetych mudakoŭ chapała nachabstva, vychodziačy sa svajho słužbovaha transpartu, kryčać nam: «Nu pryvitańnie, nievierahodnyja».
Na Łarysu skłali pratakoł pa artykule 23.34, ale jana jaho nie padpisała. Praź vialikuju kolkaść zatrymanych dalejšy los staŭ viadomy tolki kala druhoj hadziny nočy: skazali, što paviazuć na Akreścina.
«Hetaja pajezdka — uvohule kašmar. Nas zaviali ŭ bus, pierarobleny pad aŭtazak, na padłozie byli razasłanyja bieł-čyrvona-biełyja ściahi, u svaim «stakanie» my znoŭ byli ŭtroch. A kali ŭžo pryjechali, stajali jašče chvilin 40-50 u čarzie. Było, viadoma, ciažka, niejkaj žančynie stała błaha z sercam, niechta paklikaŭ joj pa dapamohu, ale tyja adkazali, što chaj siadzić».
U trochmiesnaj kamiery Akreścina pryjšłosia raźmiaščacca ŭšaścioch: «Tut nam narešcie dali butelku vady, praŭda, biez anijakich šklanak. Kali my spytali, ci daduć nam srodki asabistaj hihijeny, nam dali rułon tualetnaj papiery. Ale praź dziesiać chvilin zahadali admatać dla našych susiedziaŭ. Taksama dali płastykavy słoik, u jakim lažała kuskami narezanaje śmiardziučaje haspadarčaje myła.
Ja spała na vuzkaj karotkaj łaŭcy, nočču hareła śviatło i biła ŭ vočy. Jany kryčali ŭsiu noč, taksama, vidać, u kalidory niekaha bili, bo my čuli kryk».
Sud praciahvaŭsia dziesiać chvilin. Śviedkami spravy stali, jak miarkuje surazmoŭca, milicyjaniery, pryčym miescam ich žycharstva byŭ paznačany adras RUUSa. «Na ekranie noŭtbuka ja bačyła tolki hałavu sudździ Anastasii Lajkoŭskaj. U mianie nierazborliva niešta ŭdakładniali, ja nie pryznała vinu i mnie dali 25 bazavych».
Tym časam kalehi ŭžo paviedamili, što dyrektar daviedaŭsia pra zatrymańnie i choča zvolnić Łarysu. «Napeŭna, mnie prapanujuć napisać zajavu na zvalnieńnie, ale ja nie budu hetaha rabić, chaj šukajuć artykuł».
Łarysa Kalinoŭskaja była adnoj z tych, chto padpisaŭ adkryty list supracoŭnikaŭ Ruskaha teatra suprać hvałtu z boku siłavych struktur i ŭ padtrymku Kupałaŭskaha.
