«Ličym adličeńni i zvalnieńni niedapuščalnym». 150 supracoŭnikaŭ źviarnulisia da rektara BDEU
Vykładčyki i supracoŭniki BDEU napisali adkryty zvarot da rektara. U im jany prosiać kiraŭnictva VNU ŭstrymacca ad pakarańnia studentaŭ, vykładčykaŭ i supracoŭnikaŭ, jakija vykazvajuć svaju hramadzianskuju pazicyju. Na 12:00 piatnicy dakumient padpisała bolš za 150 čałaviek, piša Tut.by.
Aŭtary zvarotu miarkujuć, što adličeńni i zvalnieńni ŭzmacniajuć pratesnyja nastroi ŭ VNU, viaduć da eskałacyi kanfliktaŭ unutry ŭniviersiteta i nieŭzabavie mohuć stać pryčynaj masavaha sychodu studentaŭ i vykładčykaŭ.
— Usio heta niepaźbiežna pryviadzie da surjoznych nastupstvaŭ dla imidžu ŭniviersiteta ŭnutry krainy i na mižnarodnaj arenie: da pamianšeńnia kolkaści hramadzian Biełarusi i zamiežnych hramadzian, jakija pastupajuć, spynieńnia akademičnych prahram abmienu, adtoku najbolš talenavitych studentaŭ na vučobu za miažu, — adznačajuć aŭtary lista.
Im, praciahvajuć padpisanty, viadoma, što ŭ BDEU rychtujucca dakumienty na adličeńni i zvalnieńni. Pryčyna — hramadzianskaja pazicyja studentaŭ i vykładčykaŭ.
— My ličym heta niedapuščalnym, — paviedamlajecca ŭ zvarocie.
U dakumiencie jany patrabujuć:
— pierahledzieć pryniatyja rašeńni ab zvalnieńni i adličeńni z pryciahnieńniem pradstaŭnikoŭ studenckich i prafiesijnych sajuzaŭ univiersiteta;
— kiravacca humanistyčnymi pryncypami, pakładzienymi ŭ asnovu akademičnaj adukacyi;
— prystupić da farmiravańnia va ŭniviersitecie atmaśfiery ŭzajemnaj pavahi i partniorskich adnosin.
U vypadku admovy vykonvać dadzienyja patrabavańni vykładčyki i supracoŭniki BDEU pakidajuć za saboj prava zakonna damahacca admieny «niezakonnych zahadaŭ ab zvalnieńni i adličeńni». A taksama źviartacca z chadajnictvam u mižnarodnyja i respublikanskija arhanizacyi. I ŭ suviazi z «hrubym parušeńniem pryncypu akademičnych svabod» nastojvać na prypynieńni siabroŭstva vnu ŭ hetych arhanizacyjach.