Łukašenka: Nam treba jašče adnu AES pabudavać
BiełTA
Padčas adkryćcia pieršaha ŭčastka treciaj linii mietro Alaksandr Łukašenka daručyŭ pastupova pieravodzić Minsk na elektratranspart, piša BiełTA.
«U Minsku ad ruchavikoŭ unutranaha zharańnia treba sychodzić. Minsk treba spakojna, pastupova pieravodzić na elektratranspart, bo trucim ludziej», — padkreśliŭ jon.
Pavodle słoŭ Alaksandra Łukašenki, asablivuju ŭvahu treba nadać tramvajnamu ruchu. «Treba pryvieści ŭ paradak tramvajnyja šlachi, kab jany byli biasšumnymi. Dobryja ž tramvai vyrablajem, i heta dobry transpart», — adznačyŭ jon.
Łukašenka ŭ suviazi z hetym nahadaŭ ab Biełaruskaj atamnaj stancyi. Jaje pieršy enierhabłok ŭžo ŭklučany ŭ abjadnanuju enierhasistemu krainy.
«Elektraenierhii budzie dastatkova. Našy pratestuny płačuć, što niama kudy jaje padzieć. Słuchajcie, jak niama kudy padzieć elektraenierhiju? Nam jašče treba adnu takuju stancyju pabudavać, kab adyści ad zaležnaści pa vuhlevadarodach. Heta ščaście, padarunak», — zajaviŭ Łukašenka.