ŚMI daviedalisia pra 150 tysiač nie dastaŭlenych svoječasova biuleteniaŭ na vybarach u ZŠA
Paštovaja słužba ZŠA nie zmahła dastavić bolš za 150 tysiač biuleteniaŭ na vybarčyja ŭčastki da zakančeńnia hałasavańnia na prezidenckich vybarach 3 listapada. Pra heta paviedamlaje hazieta The Washington Post sa spasyłkaj na źviestki ŭstanovy.
Pavodle infarmacyi vydańnia, bolš za 12 tysiač z hetych biuleteniaŭ prypadajuć na piać štataŭ, dzie imia pieramožcy jašče nie vyznačyłasia.
U zaležnaści ad zakonaŭ kankretnaha štata dastaŭlenyja paźniej dnia vybaraŭ biuleteni mohuć być albo zaličanyja, albo pryznanyja niesapraŭdnymi. Naprykład, u Nievadzie, Paŭnočnaj Karalinie i Piensilvanii biuleteni, jakija pryjšli paśla 3 listapada, buduć padličanyja, bo paštovyja štempieli datavanyja dniom vybaraŭ. U toj ža čas u Aryzonie i Džordžyi zatrymanyja biuleteni nie ŭličvajuć pry padliku hałasoŭ, adznačaje RBK.
Vybary prezidenta ŭ ZŠA adbylisia 3 listapada. Sioleta daterminova ŭ toj ci inšaj formie (poštaj abo asabistym prychodam na ŭčastak) prahałasavali bolš za 90 młn vybarščykaŭ z 233 młn. Z-za taho, što prahałasavać pa pošcie vyrašyła biesprecedentna vysokaja kolkaść amierykancaŭ, u mnohich štatach zaciahnuŭsia praces padliku hałasoŭ, jaki idzie da hetaha času.
Na nastupny dzień paśla vybaraŭ kandydat ad respublikancaŭ, dziejučy prezident ZŠA Donald Tramp, zajaviŭ, što pieršapačatkova lidziravaŭ u mnohich štatach, navat u tych, jakija tradycyjna addajuć hałasy za demakrataŭ. Adnak zatym, pa słovach prezidenta, jon staŭ «čaroŭnym čynam» sastupać demakratu Džo Bajdenu pa miery padliku «biuleteniaŭ, jakija źjavilisia».
Tramp śćviardžaje, što zapavoleny padlik hałasoŭ z-za adpraŭki biuleteniaŭ pa pošcie — heta «machlarstva» na karyść Bajdena. Respublikaniec vystupaje za toje, kab nie ŭličvać biuleteni, atrymanyja paśla vybaraŭ. Naadvarot, Bajden zajaŭlaje, što «kožny hołas pavinien być uličany».
