«Vykarystoŭvałasia zbroja sa śviatłošumavymi bojeprypasami i humovymi kulami». Milicyja prakamientavała pratesty na Dziady
Fota Alaksandry Pilipovič-Suščyc
Pavodle pres-słužby MUS 1 listapada ŭ Biełarusi prajšli 13 pratesnych akcyj, ale ŭ rehijonach kolkaść udzielnikaŭ nie pieravyšała 10 čałaviek.
U Minsku, ličać u milicyi, akcyja z samaha pačatku nabyła nie «mirny» charaktar. Tam adznačyli, što pratestoŭcy vyjšli na prajeznuju častku praśpiekta Niezaležnaści i na 20 chvilin zabłakavali ruch transpartu ŭ abodva baki.
«Mierapryjemstva supravadžałasia faktami aktyŭnaha supraćdziejańnia pravaachoŭnym orhanam. U pryvatnaści, u rajonie Łahojskaha traktu pratestoŭcy vykarystoŭvali samarobnaje vybuchovaje prystasavańnie», — zajavili ŭ MUS.
U viedamstvie taksama paviedamili, što prymali miery pa spynieńni pravaparušeńniaŭ: vykarystoŭvałasia zbroja sa śviatłošumavymi bojeprypasami i humovymi kulami.
Za parušeńnie zakanadaŭstva ab masavych mierapryjemstvach na terytoryi Minska i Minskaha rajona zatrymana kala 300 čałaviek, u ich dačynieńni składzienyja administracyjnyja pratakoły, a pa faktach aktyŭnaha supracivu supracoŭnikam orhanaŭ unutranych spraŭ, błakavańnia ruchu pravodziacca pravierki ŭ ramkach Kryminalna-pracesualnaha zakanadaŭstva.