Kiraŭnica fiederacyi šachmat: Milicyja skazała ab praviercy dziejnaści, zabrali telefon. Siem hadzin praviała ŭ ich kampanii
Anastasija Sarokina, staršynia fiederacyi šachmat Biełarusi, vice-prezident Mižnarodnaj šachmatnaj fiederacyi (FIDE) raspaviała pra padrabiaznaści, jak 29 kastryčnika jana pierastała vychodzić na suviaź — jak akazałasia, adpraviŭšysia ŭ adno z RUUS Minska.
Praktyčna ŭvieś dzień nichto nie viedaŭ, što z Sarokinaj i dzie kankretna jana znachodzicca, adnak u toj ža dzień Anastasiju adpuścili. Jana adrazu ž pajechała ŭ Maskvu (u płanavuju kamandziroŭku), a trochi paźniej raspaviała «Trybunie» bolš padrabiaznuju infarmacyju, što ž adbyłosia.
— 29 kastryčnika, jakraz u dzień naradžeńnia majoj dački, da mianie ranicaj dadomu pryjechali supracoŭniki Partyzanskaha RUUS Minska. Mnie skazali, što pravodzicca pravierka dziejnaści fiederacyi šachmat. U pracesie razmovy kanfiskavali telefon i fłeš-karty, a potym advieźli ŭ RUUS. Kali ščyra, ja dumała, što heta standartnaja pravierka dakumientacyi ŭ ramkach dziejučaha zakanadaŭstva. Uličvajučy, što my ŭ fiederacyi maksimalna adkryty i vykonvajem zakon, zapytanyja dakumienty chutka pradstavili, na nieabchodnyja pytańni ja adkazała.
— Na jakoj padstavie ŭ vas kanfiskavali telefon i fłeš-karty?
— Heta mnie samoj niezrazumieła. Ja ŭžo napisała zajavu na viartańnie maich asabistych rečaŭ.
— Ź jakimi słovami i kali vas adpuścili?
— Skazali, što, kali źjaviacca dadatkovyja pytańni, treba budzie pryjści znoŭ. Supracoŭniki pryjšli da nas dadomu kala 8 ranicy, a vyjšła z RUUS ja kala treciaj hadziny dnia — atrymlivajecca, prykładna siem hadzin praviała ŭ kampanii pradstaŭnikoŭ pravaachoŭnych orhanaŭ. Prykładna stolki doŭžycca kłasičnaja partyja ŭ šachmaty.
— Ciapier vy znachodziciesia ŭ Maskvie. Źjechali ŭ metach biaśpieki?
— Nie, heta zahadzia zapłanavanaja kamandziroŭka, u tym liku dla praviadzieńnia pieramovaŭ ź FIDE ab minimizacyi niehatyŭnych nastupstvaŭ admovy ad praviadzieńnia šachmatnaj Alimpijady biełaruskim bokam, — skazała Sarokina.
— A jak adreahavali kalehi ŭ Maskvie na vaša zatrymańnie?
— Usie vielmi pieražyvali, bo viedali, što ŭžo da viečara ja pavinna była pryjechać u Maskvu, i raptam takoje… Tak jak ja źjaŭlajusia vice-prezidentam FIDE, pieražyvali kalehi z usich kutkoŭ śvietu.
— Vašaha muža ŭ RUUS dapuścili?
— Kali razmova skončyłasia, ja jamu patelefanavała, paprasiła, kab jon pryjechaŭ pa mianie. Sustrelisia ŭžo na vulicy. Adrazu patelefanavała dačce. Abiacała pierad adjezdam u Maskvu pryvieźci joj tort.
Hety jaje dzień naradžeńnia my, viadoma, zapomnim nazaŭždy.