Labiedźka paśla vyzvaleńnia: Štab prapanoŭvaŭ mnie zastacca ŭ Vilni, ale dla mianie pryncypova być u Biełarusi
Paśla 15 sutak aryštu na volu vyjšaŭ były kiraŭnik AHP Anatol Labiedźka. Za niekalki dzion da zatrymańnia jon byŭ pryznačany kaardynataram kamisii pa kanstytucyjnaj reformie, jakaja dziejničaje pry štabie Cichanoŭskaj.
Anatol Labiedźka. Fota z fejsbuka.
Zatrymali Labiedźku 8 kastryčnika na prypynku ŭ Viaśniancy, niedaloka ad doma.
«Ja adrazu adčuŭ niešta niadobraje, kali ŭbačyŭ mašynu DAI nie na tym miescy, dzie jana musiła stajać, jašče pasprabavaŭ jaje źniać. A potym na skryžavańni ŭbačyŭ dva busiki, choć i z numarami, ale vielmi charakternyja. Zaharełasia čyrvonaje śviatło, i ŭsio adbyłosia vielmi chutka, vyskačyła 5-6 čałaviek u bałakłavach, jakija zapchali mianie ŭ busik», — kaža Labiedźka.
Ichniuju prynaležnaść da peŭnych siłavych struktur vyznačyć nie ŭdałosia. «Ja pytaŭsia, ź jakoj vy bandy, ale adkazu nie atrymaŭ», — kaža palityk.
Siłaviki prymusili Labiedźku vyklučyć telefony. «Ja paśpieŭ tolki vykryknuć ludziam na prypynku, što zatrymlivajuć Labiedźku», — zhadvaje jon.
Ni pra zatrymańni, ni pry tranśfiery ŭ Centralny RUUS Labiedźku nie bili. «Hałoŭny z hetych bandytaŭ kazaŭ, što zaraz aformim administracyjku, a potym pojdzieš pa kryminalnaj spravie.
Ja byŭ padrychtavany da taho, što heta buduć nie adzinyja 15 sutak, za imi buduć jašče adnyja, i jašče, i jašče. A kali situacyja ŭ krainie budzie zastavacca niespakojnaj, to mohuć zavieści kryminalnuju spravu».
Labiedźka kaža, što źviazvaje svajo zatrymańnie vyklučna z tym, što ŭvajšoŭ u štab Cichanoŭskaj. «U paniadziełak abviaščajecca pra moj udzieł, u aŭtorak ja pravodžu vielmi plonnuju i cikavuju sustreču pa kanstytucyjnaj reformie z žycharami Lebiadzinaha — a ŭ čaćvier mianie zatrymlivajuć.
Štab Cichanoŭskaj prapanoŭvaŭ mnie zastacca ŭ Vilni, pracavać adtul, ale dla mianie pryncypova zastavacca ŭ Biełarusi. Ja b nie dałučyŭsia da kamandy Babaryki, Capkały ci navat Siarhieja Cichanoŭskaha, ale tut nie moh inakš, bo Śviatłana — heta 100% nie čyjści prajekt ci scenar».
Spačatku spadara Anatola trymali na Akreścina, a potym pieraviali ŭ Baranavičy. «Zvyčajna ŭ kamiery było 1-2 debašyry i ałkanaŭty, a astatnija — palityčnyja. Ja supakojvaŭ ich, kazaŭ, što u adzin hod mieŭ až 18 administracyjnych pratakołaŭ, ich heta natchniała. Było dvoje chłopcaŭ z MAZa, dvoje — z zavoda imia Vaviłava, ajcišniki, mieniedžary. Heta ŭ asnoŭnym chłopcy 25-35 hadoŭ».
«Nie dazvalali lažać dniom na narach, uvohule da palityčnych stali stavicca bolš žorstka. Zdajecca, jość adpaviedny zahad, — ličyć palityk.
— Z supracoŭnikami KDB ja nie razmaŭlaŭ, ale sa mnoj byli chłopcy, jakich zatrymlivali mienavita supracoŭniki KDB i pryvozili ŭ centralny budynak na dopyt. Adzin taki mužčyna z Smalavičaŭ kazaŭ, što jaho viali ź miaškom na hałavie, ale pry hetym pytalisia: «Bačyš čyrvonuju darožku?». «Baču, ale prabačcie, što ja ŭ abutku», — z humaram adkazvaŭ jon. Heta byli chłopcy sa sčepak, jakija nie mieli na tvary masak. Tym nie mienš, zdajecca, ich vypuścili biez kryminalnych spraŭ».
Labiedźka kaža, što mnohich viaźniaŭ ankietavali, pytalisia pra ekanamičnuju situacyju, pra mahčymyja źmieny ŭ Kanstytucyi.
Ci nie choča Labiedźka ciapier vyjechać z krainy? «Moža, i chaču, ale vyklučna pa spravach, a nie na pastajannaje žycharstva», — adkazvaje palityk.
