U Słucku zatrymali karespandentku «Novaha času» Zinaidu Cimošak
Jak paśpieła paviedamić redakcyi Zinaida Cimošak, jaje pryvieźli ŭ RAUS prosta ź vioski, dzie jana znachodziłasia. Pakul žurnalistka siadzić u kryminalistaŭ, heta ciahniecca ŭžo bolš za 2 hadziny, piša BAŽ.
«Pryjechali zranku ŭ 9 hadzin u viosku. Musić, vyznačyli pa telefonie. Nie dali dapalić piečku. Kinuła hareć. Prasiła pačakać, pakul dapalu, nie chacieła jechać. Patrabavała pozvu — prademanstravali kajdanki. Jechała na svajej mašynie, ale zzadu siadzieła žančyna-kryminalistka», — paviedamiła nam Zinaida Cimošak.
Jaje zatrymali nibyta «dziela prafiłaktyki». Taksama Zinaida Cimošak paviedamiła, što siońnia ranicaj zatrymali słuckaha aktyvista Jaŭhiena Aziornaha.
Vierahodna, zatrymańni adbylisia ŭ suviazi z akcyjaj ušanavańnia pamiaci achviaraŭ hieta ŭ Słucku, jakaja adbyłasia ŭviečary 21 kastryčnika i jakuju aśviatlała Zinaida.
Tady nievialičkaja hrupka słuččan ledź paśpieła ŭskłaści kvietki achviaram słuckaha hieta, jak źjavilisia milicyjanty i abviaścili ich vinavatymi ŭ ździajśnieńni pravaparušeńnia.
Zinaidu Cimošak nie raz zatrymlivali milicyjanty, apošni raz zatrymańnie adbyłosia ŭ Słucku 4 žniŭnia.
