Chłopca, jaki sfatahrafavaŭsia z detallu ad vadamiota, vypuścili ź izalatara
22 kastryčnika ź izalatara časovaha ŭtrymańnia na Akreścina vypuścili Mikitu Ihnaciuka, jaki prachodzić padazravanym pa kryminalnaj spravie ab arhanizacyi i padrychtoŭcy dziejańniaŭ, jakija hruba parušajuć hramadski paradak, albo aktyŭny ŭdzieł u ich. Pra heta paviedamiŭ Tut.by jaho baćka Alaksandr.
kyky.org
27-hadovaha Mikitu zatrymali padčas pratestaŭ 4 kastryčnika. U toj dzień chłopiec sfatahrafavaŭsia z hidrantam ad vadamiota. Kala 19.50 jaho zatrymali, a paźniej asudzili na 15 sutak aryštu pa artykule 23.34.
Kali termin źniavoleńnia skončyŭsia, jaho nie vypuścili z Centra izalacyi pravaparušalnikaŭ, a pavieźli ŭ IČU na Akreścina. Jak raspavioŭ baćka Mikity, syn prachodzić padazravanym pa kryminalnaj spravie pa č. 1 art. 342 KK «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich».
«Hałoŭnym dokazam ździajśnieńnia Mikitam supraćpraŭnych dziejańniaŭ u materyjałach spravy, sa słoŭ advakata, źjaŭlajecca siužet na ANT, u jakim Mikitu abvinavacili ŭ «razukamplektavańni vadamiota». Mikita nazvaŭ hety siužet paklopam», — raskazvaŭ Alaksandr Ihnaciuk.
Nahadajem, učora jahony tata, Alaksandr Ihnaciuk, zajaviŭ, što pradaje dom u vioscy Jastrabiel Stolinskaha rajona, kab sabrać hrošy na apłatu pasłuh advakata dla svajho syna.
Za paru hadzin nieabyjakavyja biełarusy sabrali jamu 20 tysiač rubloŭ.
