Dziaciej nastaŭnicy ź Viciebska, jakuju sudzili za maršy, nie pastaviać na ŭlik u SNS
U nastaŭnicy z ahraharadka Kastryčnickaja pad Viciebskam Taćciany Višnieŭskaj, jakuju dvojčy sudzili za mirnyja akcyi pratestu i jakaja na adnym z maršaŭ była z 10-hadovaj dačkoj — dobryja naviny. U dačynieńni da piedahoha spynili spravu za nievykanańnie abaviazkaŭ pa vychavańni dziaciej. U SNS (sacyjalna niebiaśpiečnaje stanovišča) siamju nie pastaviać. Ale buduć kantralavać, piša Tut.by.
Taćciana Višnieŭskaja. Fota ź jaje archiva
Nastaŭnicu ruskaj movy i litaratury siaredniaj škoły ŭ ahraharadku Kastryčnickaja Viciebskaha rajona Taćcianu Višnieŭskuju dva razy aštrafavali za mirnyja demanstracyi ŭ abłasnym centry. Piedahoh praviała sutki ŭ IČU. Na maršy pratestu 11 kastryčnika Taćciana była z 10-hadovaj dačkoj Ksienijaj. Dziciem zacikaviłasia inśpiekcyja pa spravach niepaŭnahadovych, u dom prychodzili roznyja praviaralščyki, siamji pahražali, što jaje pastaviać u SNS.
Ale ŭsio skončyłasia dobra.
Viciebski RAUS pravioŭ pravierku z nahody ŭdziełu 10-hadovaj Ksienii Višnieŭskaj u niesankcyjanavanym vuličnym šeści 11 kastryčnika.
U dziejańniach školnicy milicyja nie ŭhledzieła «składu administracyjnaha pravaparušeńnia» pa artykule 23.34 KaAP (Parušeńnie paradku arhanizacyi abo praviadzieńnia masavych mierapryjemstvaŭ). Spravu ŭ dačynieńni da dziciaci spynili.
Fota Taćciany Višnieŭskaj
Suprać maci — Taćciany Višnieŭskaj, była zaviedzienaja administracyjnaja sprava pa artykule 9.4 KaAP — za nievykanańnie abaviazkaŭ pa vychavańni dziaciej. Jaje taksama spynili: za adsutnaściu składu pravaparušeńnia.
U dačynieńni da dziaciej Taćciany — Ksienii i jaje 9-hadovaha brata Daniiła, — praviali «sacyjalnaje rasśledavańnie». Inšymi słovami, vyvučyli, u jakich umovach žyvie siamja.
U škole, dzie vučacca dzieci, 19 kastryčnika adbyłosia pasiadžeńnie Savieta «pa prafiłaktycy bieznahladnaści i pravaparušeńniaŭ niepaŭnaletnich».
Piedahohi pryjšli da vysnovy, što ŭ siamji Višnieŭskich «nie ŭstanoŭleny kryteryi i pakazčyki sacyjalna niebiaśpiečnaha stanovišča». Adnak škoła budzie štomiesiac kantralavać, jak žyvuć dzieci.
Maci zahadana vykonvać patrabavańni zakanadaŭstva ab masavych mierapryjemstvach i «nadalej nie dapuskać uklučeńnia svaich dziaciej u niesankcyjanavanyja masavyja mierapryjemstvy».
Abaim baćkam rekamiendujuć «vykonvać praviły biaśpiečnych pavodzin u hramadskich miescach i doma».
