Homielskaha aktyvista, jakoha z užyvańniem hvałtu zatrymaŭ AMAP, pakarali 15-dzionnym aryštam
Valer Ślapuchin
Valera Ślapuchina zatrymali 18 kastryčnika. Na jaho na vulicy Savieckaj u centry Homla zatrymali supracoŭniki AMAP, paviedamlaje «Svaboda».
Siłaviki prymianiali da aktyvista fizyčnuju siłu: dušyli, pavalili na ziamlu i pryciskali nahoj hałavu. Hety momant trapiŭ na videa i fota. Videazapis byŭ raźmieščany na telehram-kanale Nexta, jaki 20 kastryčnika byŭ pryznany ekstremisckim.
Siońnia Ślapuchina sudzili za niepadparadkavańnie (artykuł 23.4 KaAP). Da sudu aktyvist byŭ u izalatary časovaha ŭtrymańnia.
«Niepadparadkavańnie ja pryznaju častkova. Jano było vyklikana tym, što supracoŭniki AMAP zajavili, što ja niapravilna pierajšoŭ darohu, ale DAI nie vyklikali, nie pradstaŭlalisia, a prymianiali da mianie fizyčnuju siłu. Mnie vykručvali ruki, bili ŭ žyvot, pa nahach i paškodzili voka. Ja prasiŭ medyčnaj dapamohi, ale nie atrymaŭ», — zajaviŭ na sudzie Valer Ślapuchin.
U pratakole napisana, što jon «chapaŭsia za formu supracoŭnikaŭ, siadaŭ na ziamlu, upiraŭsia, tamu prymianili fizyčnuju siłu».
Sudździa pakaraŭ jaho aryštam na 15 sutak. Jak dokaz pravaparušeńnia ŭ sudzie demanstravali videa z telehram-kanału Nexta, jaki pryznany ekstremisckim.
