U Słavakii na karanavirus prateścirujuć usio nasielnictva, akramia dziaciej da 10 hadoŭ
Premjer Ihar Matavič i hałoŭny hihijenist Jan Mikas. Fota TASR
Ułady Słavakii majuć namier pravieści testy na karanavirus dla ŭsich žycharoŭ krainy za vyklučeńniem dziaciej da 10 hadoŭ. Pra heta zajaviŭ słavacki premjer-ministr Ihar Matavič. Čakajecca, što biaspłatnaje testavańnie pačniecca ŭžo praz tydzień. Pakul nieviadoma, ci budzie jano abaviazkovym, piša Polskaje radyjo.
Ułady ŭ Bracisłavie chočuć, kab uvieś praces pravodziŭsia vajskoŭcami biez udziełu miedycynskaha piersanału, jaki pracuje ŭ balnicach z pacyjentami z COVID-19.
U nastupnyja vychodnyja testavańnie projdzie ŭ troch rehijonach, najbolš paciarpiełych ad epidemii. Pavodle słoŭ premjer-ministra Ihara Mataviča, heta dazvolić pravieryć mietodyku testavańnia i arhanizavać punkty zboru ŭzoraŭ.
«Heta budzie apieracyja, jakoj Słavakija jašče nie viedała», — adznačyŭ słavacki premjer. Ihar Matavič abviaściŭ, što tyja, u kaho vyniki testaŭ na karanavirus buduć stanoŭčymi, adpraviacca na chatni karancin.
Za ŭvieś čas u Słavakii zafiksavana 28 268 vypadkaŭ, ale padčas pieršaj chvali było ŭsiaho 10 tysiač vypadkaŭ, vialiki rost nazirajecca padčas druhoj chvali (užo bolš za 18 tysiač vypadkaŭ). Učora, naprykład, byli zafiksavanyja 1968 vypadkaŭ za dzień, pazaŭčora — 2 075. Za ŭvieś čas pamior 71 čałaviek (23 padčas druhoj chvali).