«My suprać chłuśni i hvałtu, suprać biezzakońnia i ŭcisku pravoŭ» — mocny videazvarot rabotnikaŭ «Hrodna Azot»
«My, rabotniki AAT «Hrodna Azot», źviartajemsia da ŭsich žycharoŭ našaj krainy. My, azotaŭcy, jak i mnohija inšyja, nie možam zastavacca ŭbaku ad taho, što adbyvajecca ŭ našaj lubimaj Biełarusi.
My stamilisia i kateharyčna suprać padmanu i žorstkaści. Suprać toj biesčałaviečnaści, jakaja adbyvajecca ciapier na vulicach na našych vačach i vačach našych dziaciej.
My chočam źviarnucca da rabotnikaŭ inšych dziaržaŭnych pradpryjemstvaŭ Biełarusi. Što b ni kazali pra nas u aficyjnych dziaržaŭnych ŚMI, my salidarnyja z vami. I nie možam prosta nazirać za tym, što adbyvajecca, zboku. Absalutnaja bolšaść rabotnikaŭ našaha zavoda prytrymlivajecca hetaj ža pazicyi. Ale nie ŭsie mohuć adkryta jaje vykazvać z roznych pryčynaŭ.
Kali havaryć pra pryčyny, chočam źviarnucca da administracyi pradpryjemstva. Mnohija z vas taksama suprać taho, što adbyvajecca ŭ krainie, ale nie mohuć kazać pra heta adkryta. Kali łaska, pierastańcie pieraškadžać vykazvańniu svajoj dumki rabotnikami pradpryjemstva. Bo kožny hramadzianin našaj krainy maje prava na svoj punkt hledžańnia, jaki moža nie supadać z vašym. Pierastańcie cisnuć na ludziej i zapałochvać ich. My i tak mocna zaniepakojenyja kolkaściu našych supracoŭnikaŭ, što zvalniajucca. Siarod ich śpiecyjalisty, na padrychtoŭku jakich patrebnyja hady. Razvalvajucca cełyja kalektyvy.
My źviartajemsia da administracyi horada i vobłaści. Chočam nahadać vam, što ŭsie padziei ŭ horadzie i krainie biaruć svoj pačatak z abviaščeńnia vynikaŭ vybaraŭ na vybarčych učastkach. I absalutna nieabhruntavanaha prymianieńnia hvałtu siłavikami na vulicach našych haradoŭ. Vy nam abiacali nie pieraškadžać mirnym akcyjam, mitynham i šeściam. Vy nam abiacali, što bolš na vulicach našaha horada nie budzie siłavikoŭ biez formiennaha adzieńnia i biez znakaŭ adroźnieńnia. Adnak represii praciahvajucca i dalej, navat suprać žurnalistaŭ, starych i dziaciej. My nie možam spakojna nazirać, jak śviatłašumavymi hranatami zakidvajuć našych maci. I kali nie vaša kampietencyja źmianieńnie palityčnaj situacyi ŭ krainie, to spynić hvałt u dačynieńni da mirnych hramadzianaŭ u vašych siłach.
My zaniepakojenyja ŭciečkaj za miažu śpiecyjalistaŭ i pracoŭnych kadraŭ. Taksama vysokakvalifikavanyja kampanii ajci-śfiery vymušanyja pieranosić svaje ofisy i biznesy ŭ cełym u susiednija krainy. Što nie moža nie adbicca na ekanamičnaj situacyi ŭ krainie.
Hniacie situacyja ź biesprecedentnym ciskam na studentaŭ. Heta budučynia našaj krainy, i my nie majem prava jaje stracić i ŭpuścić.
Ciažka hladzieć na cisk, jaki čynicca na rabotnikaŭ kultury, kali zakryvajucca cełyja teatry.
Na miedykaŭ — i ŭ taki składany dla ich čas, kali jany, nie apuskajučy ruk, zmahajucca z pandemijaj.
Na najlepšych trenieraŭ i spartoŭcaŭ, na honar našaj krainy ŭ i tak vielmi składany čas dla biełaruskaha sportu.
Ličym nieprymalnym rehularny kryminalny pieraśled kandydataŭ u prezidenty, ich paplečnikaŭ, siabraŭ štaboŭ i inicyjatyŭnych hrupaŭ. Tolki z kandydataŭ u 2006 asudžany Kazulin, u 2011-m — Niaklajeŭ, Vus, Rymašeŭski, Sańnikaŭ, Statkievič, u 2020-m u SIZA Cichanoŭski i Babaryka.
My, jak i astatnija žychary Biełarusi, za praŭdu, prava i mahčymaść mieć svaju dumku.
My suprać chłuśni i hvałtu, suprać biezzakońnia i ŭcisku pravoŭ. U tym liku i prava vybaru. Suprać falsifikacyi i žorstkaści.
My patrabujem abarony i vykonvańnia našych kanstytucyjnych pravoŭ.
Artykuł 21. Zabieśpiačeńnie pravoŭ i svabodaŭ hramadzian Respubliki Biełaruś jość najvyšejšaja meta dziaržavy.
Artykuł 33. Kožnamu harantujecca svaboda mierkavańniaŭ, pierakanańniaŭ i svabodnaje ich vykazvańnie. Manapalizacyja srodkaŭ masavaj infarmacyi dziaržavaj, hramadskimi abjadnańniami abo asobnymi hramadzianami, a taksama cenzura nie dapuskajucca.
Artykuł 35. Svaboda schodaŭ, mitynhaŭ, vuličnych šeściaŭ, demanstracyj i pikietavańniaŭ, jakija nie parušajuć pravaparadak i prava inšych hramadzianaŭ Respubliki Biełaruś, harantujucca dziaržavaj.
Artykuł 38. Hramadzianie Respubliki Biełaruś majuć prava svabodna vybiracca i być vybranymi.
Taksama my zasmučanyja situacyjaj na mižnarodnaj arenie. Adklikańniem pasłoŭ praktyčna ŭsich jeŭrapiejskich demakratyčnych krainaŭ. My baimsia ekanamičnych sankcyj dla našaj krainy i zakryćcia miežaŭ, što moža vyklikać ciažkaści ŭ realizacyi našaj pradukcyi za miažoj.
My aburanyja, što tak i nie zaviedzienaja nivodnaja kryminalnaja sprava pa faktach źbićcia mirnych hramadzianaŭ i zatrymanych. Pa faktach hibieli ludziej na vulicach i paśla Akreścina. Choć uvieś internet poŭny žudasnymi dyjahnazami, videa źbivańniaŭ i fota ich nastupstvaŭ.
My chočam vykazać ščyraje spačuvańnie ŭsim siemjam zahinułych i źnikłych bieź viestak, usim paciarpiełym pry zatrymańniach. Vykazać svaju padtrymku tym, kaho pieraśledujuć z palityčnych matyvaŭ i ichnim siemjam.
My chočam žyć u svabodnaj i niezaležnaj Biełarusi. My — serca biełaruskaj chimii. I siońnia hetaje serca, niahledziačy ni na što, bjecca va ŭnison z sercami miljonaŭ biełarusaŭ, jakija stupili na darohu pieramienaŭ».
Zvarot skančajecca pieśniaj hurta «Tor Bend» — «Uchodi».
