Francyja, Polšča i Hiermanija zaklikajuć pravieści novyja vybary ŭ Biełarusi i hatovyja ŭvodzić sankcyi suprać Łukašenki
Ministry zamiežnych spraŭ Francyi, Polščy i Hiermanii vystupili z sumiesnaj zajavaj, u jakoj asudzili paślavybarnyja represii ŭ Biełarusi i vykazali hatoŭnaść uvodzić dadatkovyja sankcyi suprać łukašenkaŭcaŭ.
«Našy try krainy rašuča asudžajuć hvałt z boku biełaruskaj ułady i advolnyja aryšty paśla prezidenckich vybaraŭ, vyniki jakich jany nie pryznajuć, — havorycca ŭ zajavie. — Jany zaklikajuć da novych svabodnych i spraviadlivych vybaraŭ u adpaviednaści ź mižnarodnymi standartami i ŭ prysutnaści naziralnikaŭ ABSIE/BDIPČ, biez umiašańnia zvonku. Jany padtrymlivajuć pasrednickija namahańni ABSIE, nakiravanyja na sadziejničańnie inkluziŭnamu dyjałohu ź biełaruskim hramadstvam u cełym. Jany znoŭ zaklikajuć biełaruskija ŭłady vyzvalić usich palityčnych źniavolenych i advolna zatrymanych, staranna rasśledavać usie parušeńni pravoŭ čałavieka i supracoŭničać u ramkach Maskoŭskaha miechanizmu ABSIE. Jany vitajuć ćviordy adkaz JEZ šlacham pryniaćcia sankcyj, jakija buduć rehularna kantralavacca, i hatovyja pryniać dalejšyja abmiežavalnyja miery, u tym liku ŭ dačynieńni da jurydyčnych asob i vysokapastaŭlenych słužbovych asob, uklučajučy A. Łukašenku. Jany zaklikajuć Jeŭrapiejskuju Kamisiju raspracavać kompleksny płan ekanamičnaj padtrymki demakratyčnaj Biełarusi.
Francyja i Hiermanija vykazvajuć poŭnuju salidarnaść z Polščaj i Litvoj paśla adklikańnia ich pasłoŭ u Minsku; našy try krainy zabiaśpiečać skaardynavany jeŭrapiejski adkaz pa hetym pytańni. Akramia taho, našy try krainy poŭnyja rašučaści padtrymać biełaruski narod jak unutry Biełarusi, tak i ŭ vyhnańni ŭ jaho baraćbie za demakratyju, spynieńnie hvałtu i represij i vyzvaleńnie ŭsich palityčnych źniavolenych. Budzie pryniaty kompleks mier pa dalejšym umacavańni hramadzianskaj supolnaści, jaki aktyŭna prasoŭvaje pryncypy demakratyi, pravoŭ čałavieka i viaršenstva prava ŭ Biełarusi jak našu ahulnuju metu. Budzie ŭklučana, u pryvatnaści, padtrymka niezaležnych srodkaŭ masavaj infarmacyi, pravaabaroncaŭ i žanočych arhanizacyj».
Zajava była pryniataja paśla sustrečy Žana Lo Dryjana, Źbihnieva Rau i Chajka Maasa ŭ Paryžy 15 kastryčnika.