«Nie chaču zastacca ŭ historyi jak prezident, jaki stralaŭ va ŭłasnych hramadzian»: prezident Kyrhyzstana padaŭ u adstaŭku
Prezident Saaranbaj Žeenbiekaŭ syšoŭ u adstaŭku, paviedamlaje jaho pres-słužba.
«Na žal, ahresija nie ścichaje, patrabavańnie majoj nieadkładnaj adstaŭki praciahvajecca. Biahučaja situacyja blizkaja da dvuchbakovaha kanfliktu. Z adnaho boku — pratestoŭcy, z druhoha — pravaachoŭnyja orhany. Vajskoŭcy i pravaachoŭnyja orhany abaviazanyja ŭžyvać zbroju dla abarony Dziaržaŭnaj rezidencyi. U hetym vypadku praljecca kroŭ, heta niepaźbiežna. Ja zaklikaju abodva baki nie paddavacca pravakacyjam.
Darahija maje suajčyńniki! Dla mianie mir u Kyrhyzstanie, cełasnaść krainy, adzinstva našaha naroda i spakoj u hramadstvie vyšej za ŭsio. Niama ničoha daražejšaha dla mianie za žyćcio kožnaha majho suajčyńnika. Ja nie trymajusia za ŭładu. Nie chaču zastacca ŭ historyi Kyrhyzstana jak prezident, jaki praliŭ kroŭ i stralaŭ va ŭłasnych hramadzian», — havorycca ŭ jaho zajavie.
Pratesty ŭ Kyrhyzstanie ŭspychnuli 5 kastryčnika: ludzi byli niezadavolenyja vynikami parłamienckich vybaraŭ. Na ich dumku, u parłamient prajšli partyi, jakija padtrymlivali prezidenta. Uviečary 5 kastryčnika pratestoŭcy ŭvarvalisia ŭ budynak Biełaha doma ŭ Biškieku, dzie znachodziacca parłamient i administracyja prezident. Potym pajšli ŭ Kamitet nacyjanalnaj biaśpieki i vyzvalili z-pad varty eks-prezidenta Ałmaźbieka Atambajeva, a nastupnaj ranicaj u aŭtorak zachapili budynak urada. Jany taksama zapatrabavali adstaŭki Žeenbiekava.
Toj u vyniku ŭvioŭ u Biškieku nadzvyčajnaje stanovišča, paŭtorna aryštavaŭ Atambajeva. Novym premjeram byŭ pryznačany Sadyr Žaparaŭ, jaki ŭčora zajaviŭ, što viaducca pieramovy pra sychod Žejenbiekava.
