Taćcianu Sieviaryniec adpuścili dadomu ź SIZA ŭ Viciebsku: joj niekalki razoŭ vyklikali chutkuju
Taćcianie Sieviaryniec — 66 hadoŭ. Jana — nastaŭnik ruskaj movy i litaratury, zaraz na piensii. Maci traich dziaciej i babula siemiarych unukaŭ. Kaardynatar niezarehistravanaj BCHD u Viciebskaj vobłaści. Fota: Ihar Maćviejeŭ, Tut.by
Maci palityka i palitviaźnia Paŭła Sieviarynca pa patrabavańni miedykaŭ adpuścili dadomu ź SIZA, kudy jaje advieźli paśla zatrymańnia 14 kastryčnika. Pra heta Tut.by paviedamiŭ jaje muž Kanstancin Sieviaryniec.
U Dzień maci, 14 kastryčnika, Taćcianu Sieviaryniec zatrymali kala padjezda jaje doma i advieźli ŭ Pieršamajski RAUS.
— U RAUS Taćciana znachodziłasia paŭsutak: z abiedu i da dźviuch hadzin nočy. Potym jaje advieźli ŭ SIZA. Joj stała drenna: padniaŭsia cisk, hipiertaničny kryz. Niekalki razoŭ pryjazdžała chutkaja dapamoha. Miedyki nastajali, kab Taćcianu pa stanie zdaroŭja adpuścili dadomu. Supracoŭniki milicyi, kaža žonka, rabić hetaha nie chacieli, ale byli vymušanyja padparadkavacca patrabavańniu daktaroŭ. Siońnia ranicaj Taćciana pryjšła dadomu, — raspavioŭ Kanstancin Sieviaryniec.
Taćciana paviedamiła mužu, što jaje abvinavačvajuć va ŭdziele ŭ maršy piensijanieraŭ 12 kastryčnika ŭ Viciebsku.
— Ale nijakaha maršu faktyčna nie było: hrupa piensijanieraŭ sabrałasia, kab padyści da harvykankama i sustrecca z pradstaŭnikami ŭłady — adznačyŭ Kanstancin Sieviaryniec.
Dokazam tamu, što piensijaniery 12 kastryčnika prajšli pa centry Viciebska prykładna 300 mietraŭ, słužyć strym, jaki viała adna z haradžanak — Alena Januškoŭskaja (jaje taksama zatrymali). Tam bačna, što pažyłyja ludzi pačali ruch u rajonie pierasiačeńnia vulic Zamkavaj i Lenina, prajšli pa Lenina kala Mastackaha muzieja i zbočyli da harvykankama. Pry hetym jany ničoha nie skandavali, ale nieśli niekalki płakataŭ.
