«Tak nie pavinna, tak nie moža praciahvacca». Dźmitryj Šepieleŭ prakamientavaŭ źbićcio Maksima Charošyna
Televiadučy Dźmitryj Šepieleŭ prakamientavaŭ u instahramie źbićcio svajho studenckaha siabra Maksima Charošyna. Televiadučy napisaŭ, što nie moža maŭčać, «bo nikoli źvierstvy AMAPa Biełarusi nie tyčyłasia mianie tak blizka i tak asabista».
— Ja viedaju, što bolšaść z vas žyvuć nie ŭ Biełarusi, ale ja pavinien padzialicca tym, što adčuvaju ciapier: nianaviść, złość i razhublenaść. Heta moj siabar Maksim, my znajomyja sa studenckich hadoŭ. Učora ranicaj u Minsku na jaho napali nieviadomyja ŭ maskach, vyciahnuli z mašyny, źbili, naciahnuli na hałavu bałakłavu i pavieźli ŭ izalatar, dzie źbivali jašče dźvie hadziny, katavali, vybivajučy pryznalnyja pakazańni, — napisaŭ Šepieleŭ.
Jon adznačaje, što ŭžo dva miesiacy biełarusy patrabujuć mirnaj pieradačy ŭłady i ŭvieś hety čas žyvuć i azirajucca, ci nie pryjšli pa ich ludzi ŭ cyvilnym, chavajucca pa dvarach, ratujučysia ad pieraśledu, chavajucca ad śviatłošumavych hranat. Pa słovach televiadučaha, «tak nie pavinna, tak nie moža praciahvacca».
«Jany płaciać hetuju canu za novaje žyćcio ŭ novaj krainie, u Biełarusi, jakuju jany zasłuhoŭvajuć, svabodnaj ad strachu i dyktatury. I jany pavinny pieramahčy. Ja chaču vas padtrymać. Ja vielmi hanarusia vami. Žyvie Biełaruś!» — napisaŭ Šepieleŭ.
Ranicaj 13 kastryčnika, nahadajem, žorstka zatrymali adnaho z ułaśnikaŭ staličnaj kvietkavaj kramy «Pieršy kvietkavy» Maksima Charošyna. Jaho mocna źbili — Charošyn byŭ špitalizavany. Videa, jak Charošyna z RUUS vyvodziać miedyki, razyšłosia pa sacsietkach i vyklikała mocny rezanans.
Pa słovach advakata, siarod traŭmaŭ Maksima aciok unutranych orhanaŭ, aciok mašonki, padazreńnie na pierałom u halinie halonki, šmatlikija ŭdary, u mužčyny «całkam adbity ŭvieś levy bok».
U kamientary, jaki pradastaviła TUT.BY HUUS Minharvykankama havaryłasia, što Charošyna dastavili ŭ Pieršamajskaje RUUS za ŭčynieńnie administracyjnaha pravaparušeńnia. «Rabotniki achovy zdaroŭja prybyli pa vykliku supracoŭnikaŭ milicyi, jakim jon paviedamiŭ ab najaŭnych u jaho zachvorvańniach. Maładoha čałavieka advieźli ŭ miedustanovu. U častcy pryčynieńnia cialesnych paškodžańniaŭ, pra jakija paviedamlajecca ŭ niekatorych internet-krynicach, infarmacyja nie pravieranaja», — zajavili ŭ milicejskim viedamstvie.
Dźmitryj Šepieleŭ — televiadučy rodam ź Minska, pačynaŭ karjeru na biełaruskim radyjo, pracavaŭ na BT i ANT. Z 2004 pa 2014 vioŭ pieradačy i na rasijskich, i na ŭkrainskich kanałach. U apošni čas pracavaŭ tolki ŭ Rasii, vioŭ tok-šou «Nasamreč», adkul zvolniŭsia ŭ lutym hetaha hoda.
