Łukašenka raspavioŭ ab prapanovie pieradać 71 prezidenckaje paŭnamoctva
Padatkovaja sistema Biełarusi pavinna być prostaj i zrazumiełaj dla ŭsich hramadzian. Pra heta zajaviŭ siońnia Alaksandr Łukašenka, zasłuchoŭvajučy dakład pa raźvićci nacyjanalnaj padatkovaj sistemy. Na dakład pryjšli pieršy vice-premjer Mikałaj Snapkoŭ, ministr pa padatkach i zborach Siarhiej Nalivajka i ministr finansaŭ Juryj Sielivierstaŭ, piša BiełTA.
«Pakolki apošnim časam šmat havorać ab pieraraźmierkavańni paŭnamoctvaŭ, vidać, kamuści ich nie chapaje, a ŭ asnoŭnym heta pravilna: urad i inšyja orhany ŭłady treba dahružać, źnimać z prezidenta nieŭłaścivyja pytańni. Niadaŭna ja atrymaŭ zapisku: prapanujecca 71 paŭnamoctva, kali možna tak skazać, pieranieści ad prezidenta na ŭsie ŭzroŭni ŭłady. Ale heta asobnaja tema razmovy, heta jak padviadzieńnie da asnoŭnaha pytańnia. Absalutna nie ŭmiešvajučysia ŭ rabotu ŭrada (nie chaciełasia b mnie heta rabić), tym nie mienš ja chacieŭ by z vami abmierkavać pytańni ŭdaskanaleńnia našaj padatkovaj sistemy», — skazaŭ Alaksandr Łukašenka.
Jon adznačyŭ, što padatkovaja sistema — adzin z asnoŭnych elemientaŭ ekanamičnaj palityki, jana pavinna być prostaj i zrazumiełaj dla ŭsich hramadzian. «My šmat u hetym napramku zrabili. Ale, ja pamiataju, my damaŭlalisia, što vy vydadzicie novuju, bolš daskanałuju sistemu padatkaabkładańnia, madernizujecie ciapierašni Padatkovy kodeks — tam, dzie patrebna, viadoma, nakolki heta mahčyma. U nas adnosna niadrenny Padatkovy kodeks, ale ničoha daskanałaha nie byvaje, ale da hetaj daskanałaści treba pastajanna ruchacca», — padkreśliŭ Łukašenka.
Jak adznačyli ŭ MPZ, ličbavizacyja padatkovaj sistemy praduhledžvaje stvareńnie adzinaj sistemy intelektualnaj apracoŭki źviestak, pabudovu bazy dachodaŭ i raschodaŭ fizičnych asob, a taksama dalejšaje raźvićcio isnujučych infarmacyjnych sistem padatkovych orhanaŭ i pašyreńnie śpiektra elektronna-ličbavych servisaŭ.
Płanujecca, u pryvatnaści, pieravieści ŭ ličbavy varyjant źviestki i dakumienty płacielščykaŭ, jakija zachoŭvajucca ŭ infarmacyjnych resursach MPZ abo atrymlivajucca ad inšych dziaržorhanaŭ i krynic. I zatym ukaranić intelektualnuju sistemu analizu ryzyk u śfiery padatkaabkładańnia.
U pracesie pabudovy bazy dachodaŭ i raschodaŭ fizičnych asob budzie aptymizavana i skaročana spravazdačnaść, jakuju płacielščyki pradstaŭlajuć u dziaržorhany, aŭtamatyzavany praces uliku takich źviestak. Płacielščyki zmohuć skarystacca servisnymi pasłuhami ŭ bieskantaktnym farmacie. U asabistym kabiniecie płacielščyka źjaviacca dadatkovyja elektronnyja servisy, mabilny dadatak.
Ličbavizacyja, na dumku jaje inicyjataraŭ, stvoryć umovy dla zabieśpiačeńnia paŭnaty, prastaty i prasočvajemaści ŭniasieńnia padatkovych płaciažoŭ.
