Były rektar Hrodzienskaha miedycynskaha ŭniviersiteta bolš nie sienatar Savieta Respubliki. Raniej jon asudziŭ hvałt z boku siłavikoŭ
Były rektar Hrodzienskaha miedycynskaha ŭniviersiteta Viktar Śniažycki bolš nie sienatar. Viktar Alaksandravič patłumačyŭ, što heta było jaho rašeńnie i pryniaŭ jon jaho z pryčyny svajho stanu zdaroŭja, piša Tut.by.
Były rektar Hrodzienskaha miedycynskaha ŭniviersiteta Viktar Śniažycki. Fota: sajt Hrodzienskaha abłasnoha kliničnaha kardyjałahičnaha centra
Členaŭ vierchniaj pałaty biełaruskaha parłamienta — Savieta Respubliki Nacyjanalnaha schodu — vybrali ŭ listapadzie 2019 hoda. Być sienataram Śniažycki pavinien byŭ čatyry hady. Da hetaha sklikańnia jon taksama zajmaŭ pasadu sienatara.
Viktar Alaksandravič skazaŭ, što heta było jaho rašeńnie — skłaści paŭnamoctvy sienatara, pryčyna — «pa stanie zdaroŭja». U vieraśni Viktar Alaksandravič pierastaŭ kiravać Hrodzienskim mieduniviersitetam. Zamiest jaho Alaksandr Łukašenka ŭzhadniŭ na hetuju pasadu Alenu Kratkovu. Da hetaha jana była načalnikam hałoŭnaha ŭpraŭleńnia achovy zdaroŭja Hrodzienskaha abłvykankama.
Viktar Śniažycki raspavioŭ, što ciapier pracuje na kafiedry ŭ Hrodzienskim miedyčnym univiersitecie.
Nahadajem, raniej na svajoj staroncy ŭ Facebook jon asudziŭ hvałt z boku siłavikoŭ. Jon napisaŭ: «Šanoŭnyja siabry! Padtrymlivaju svaich kalehaŭ-miedykaŭ i ŭsich tych, chto pratestavaŭ suprać hvałtu i zatrymańniaŭ. Kadry, jakija śviedčać ab žorstkich źbivańniach demanstrantaŭ, šakirujuć. Tolki narod Biełarusi, jaho vola vyznačyć, jak nam žyć dalej».
Viktar Śniažycki — viadomy i pavažany kardyjołah i prafiesar. Jon kiravaŭ kardyjałahičnym adździaleńniem, a zatym byŭ hałoŭnym doktaram Hrodzienskaha abłasnoha kardyjałahičnaha centra. Rektaram Hrodzienskaha dziaržaŭnaha miedycynskaha ŭniviersiteta jon pracavaŭ z 2010 hoda.
