Eks-namieśnika prakurora z Žodzina zatrymali i asudzili: vyjšaŭ na pratest
2 kastryčnika ŭ Žodzinie zatrymali 56-hadovaha Ihara Damaronka.
«Ja vychodziŭ na vulicu 23 vieraśnia, u dzień inaŭhuracyi Łukašenki. U Žodzina ludzi išli roznymi maršrutami pa horadzie. Byŭ bieź simvoliki, prosta šarahovy ŭdzielnik šeścia, — raskazvaje Damaronak. — Milicyja ž viadzie fota i videafiksacyju, ja tvar nie chavaju. Nu i mianie «zafiksavali».
U piatnicu, 2 kastryčnika, pazvanili ź milicyi: treba padjechać. Ja kažu — šmat spraŭ, davajcie ŭžo ŭ paniadziełak. Pazvanili jašče raz viečaram: nie, treba siońnia. Ja padjechaŭ, mianie adrazu ž i zatrymali».
Da paniadziełka Damaronak prabyŭ pad vartaj.
«5 kastryčnika byŭ chutki sud, pa skajpie. Ja vinu nie admaŭlaju, ale liču, što hramadzianie siońnia znachodziacca ŭ stanie krajniaj nieabchodnaści, heta artykuł 5.3 KaAP. Jany nie majuć inšaj mahčymaści vykazać svaju pazicyju, adpaviedna dziejańnie ŭ stanie krajniaj nieabchodnaści nie źjaŭlajecca złačynstvam. Tym bolš pravavyja normy ŭ inšy bok nie pracujuć — atrymać dazvoł na mitynh niemahčyma.
Ale mianie, kaniečnie, pryznali vinavatym, dali štraf 10 bazavych».
Damaronku 56 hadoŭ. Jon były rabotnik prakuratury, dasłužyŭsia da namieśnika prakurora horada Žodzina, ale ŭ 2007 hodzie zvolniŭsia.
«Nie skažu, što syšoŭ čysta pa palityčnych matyvach, ale pracavać u toj sistemie nie chacieŭ. Bo jana niespraviadlivaja, funkcyjanuje jak sistema dziela sistemy. Kali ty ŭ joj — to tabie i dobra, asabliva heta bačna siońnia. Ale prostym ludziam — niaprosta», — tłumačyć Ihar.
Ciapier Damaronak zajmajecca jurydyčnaj praktykaj. Pierad sioletnimi vybarami jon uvachodziŭ u inicyjatyŭnuju hrupu Babaryki, źbiraŭ podpisy.