Na sielskich vybarach u Rasii pieramahła prybiralščyca, jakuju mer paprasiŭ pabyć techničnym kandydatam
Samaja śmiešnaja navina palityčnaha žyćcia Rasii apošniaha času — sielskija vybary ŭ Kastramskoj vobłaści. Tut raniejšy kiraŭnik administracyi pasiołka paprasiŭ prybiralščycu pabyć jaho fiktyŭnym kankurentam na vybarach — i razhromna prajhraŭ joj.
Vioska Pavalichina znachodzicca za 430 kiłamietraŭ ad Maskvy, heta pryblizna jak ad Minska da Tamašoŭki ci Kamaryna, samych dalokich viosak Biełarusi. Pracy niama nijakaj, tamu miascovyja žychary masava jeździać na zarobki ŭ Maskvu ci ŭ Kastramu.
Apošnija piać hadoŭ pasialeńniem kiravaŭ były palicejski, člen «Adzinaj Rasii» Mikałaj Łokcieŭ. Jon źbiraŭsia zastavacca na druhi termin, ale dla salidnaści treba było pravieści alternatyŭnyja vybary.
Łokcieŭ uhavorvaŭ pa čarzie vosiem deputataŭ sielsavieta, ale jany zmahli admovicca. Z pavahi da načalnika pahadziłasia tolki 35-hadovaja prybiralščyca budynka administracyi Maryna Udhodskaja.
Maryna Udhodskaja, fota RBK
U vyniku na vybary pajšli dvoje, Łokcieŭ i Udhodskaja. Prahramy nie było ni ŭ koha ź ich. Členu «Adzinaj Rasii» było laniva hetym zajmacca, a prybiralščyca razumieła, što idzie techničnym kandydytam.
Adnak asablivaść rasijskich vybaraŭ u tym, što tam choć i prymianiajuć pry žadańni administratyŭny resurs, ale ŭ pryncypie ličać hałasy. U vyniku na ŭčastki pryjšło tolki kala traciny vybarcaŭ, adnak jany rašuča prakacili byłoha mera.
Maryna Udhodskaja nabrała 62% hałasoŭ. Nastupny tydzień jana pracavała prybiralščycaj administracyi, adnak ad pačatku kastryčnika ŭstupiła ŭ paŭnamoctvy.
Novaja kiraŭnica pryznavałasia, što pa-raniejšamu nie ŭjaŭlaje svaje abaviazki: «Heta ž ciažka: ja z dakumientami ni razu spravy nie mieła».
