Julija Čarniaŭskaja adkazvaje Piarcovu: Zisier unačy siadzieŭ by z žurnalistami ŭ redakcyi Tut.baj i sprabavaŭ by vyciahnuć ich ź milicyi
Kulturołah Julija Čarniaŭskaja, udava zasnavalnika partała Tut.baj Juryja Zisiera, dała publičny adkaz na vypad kiraŭnika kanała «Mir» Uładzimira Piarcova.
Čytajcie. Kiraŭnik kanała «Mir»: Ciapierašni Tut.baj maje vielmi ŭskosnyja adnosiny da žurnalistyki
«Tut niadaŭna adzin teledziejač davoli vysokaha ranhu «Sajuznaj dziaržavy» paskardziŭsia: maŭlaŭ, chiba ž tak siabie pavodziŭ by Tut.baj pry Zisiery? Majecca na ŭvazie, maŭlaŭ, pry Zisiery ŭsio było bolš łajtova. Što nie pieraškadžała zabaranić jaho tvar na TB i nie nazyvać imia. I navat kali rabili pieradaču pra adnoŭleny im arhan u Vierchnim horadzie, jaho paprasili adyści ŭbok. Jon cicha adyšoŭ. Arhan byŭ dla jaho važniejšy za samalubstva.
Adkažu teledziejaču. Pa-pieršaje, mnie zdajecca, ciapier hałoŭny pryncyp partała — infarmacyja i aśviatleńnie padziej z roznych punktaŭ hledžańnia — całkam vytrymlivajecca. Pa-druhoje, u paru ciažkich padziej u žyćci nacyi (2006, 2010, terakt u mietro i hetak dalej) Tut.baj zaŭsiody infarmavaŭ nieadkładna, praŭdziva i biez łakavańnia. A ciapier mienavita taki… Nie, nie padzieja, a čas. Tolki nie dzień i nie tydzień, a niekalki miesiacaŭ. Nie da fota kacianiat.
Ja vam skažu, što rabiŭ by «Zisier», heta značyć, moj Jura. Jon by ciapier siadzieŭ u redakcyi razam z žurnalistami — i ŭnačy taksama, kali niespakojna. U asabliva ciažkija nočy jon by razvoziŭ ich pa damach (była takaja tradycyja). Jon by sprabavaŭ vyciahnuć ich z adździaleńniaŭ milicyi: i takoje było. I jon by rabiŭ marlevyja prymočki i zmazvaŭ jodam tych, chto akazvaŭsia ŭ redakcyi z udarami i ranami. Pryčym nie tolki žurnalistaŭ, a i tych, kaho intervjujuiuć. Takoje taksama byvała, a ŭ Jury byli akuratnyja «miedycynskija» ruki.
A Tut.baj by infarmavaŭ — i Jura nie staviŭ by jamu apaślivych pieraškod. I raspłačvaŭsia b niervami i zdaroŭjem. Jak i raspłačvaŭsia, tolki čytačoŭ ab hetym nie apaviaščaŭ.
Tak što nie treba hetych štučnych sprobaŭ padzialić pohlady Zisiera i rabotnikaŭ Tut.baja! Jany byvali roznymi, ale nie ŭ pryncypach sumlennaha i roznabakovaha infarmavańnia. Hetyja ludzi byli jaho siabrami i adnadumcami. Jany takimi i zastalisia».
Za pieršyja paŭhadziny jaje mierkavańnie ŭ fejsbuku sabrała kala 500 łajkaŭ.
