Zvolnili vykładčycu minskaha mieda — pryjšła padtrymać studentaŭ na adłupie ŭ administracyi
Pa «zhodzie bakoŭ i ŭłasnym žadańni» ź Biełaruskaha dziaržaŭnaha miedycynskaha ŭniviersiteta syšła vykładčyca łabaratoryi praktyčnaha navučańnia Julija Matusievič.
Raniej jana źniałasia ŭ videa ŭ padtrymku hramadzianskich pravoŭ, a taksama aktyŭna abaraniała svaich studentaŭ.
Čamu daviałosia pisać zajavu?
«Učora padčas praktyčnych zaniatkaŭ pa pieršaj dapamozie ŭ kabiniet, dzie ja vykładała, pryjšła dekan i źviarnułasia da adnoj sa studentak z prośbaj pryjści da 14-j u rektarat pa pytańni praviedzienaj u sieradu siadziačaj zabastoŭki», — raskazała Matusievič «Našaj Nivie».
«U hety čas u mianie byŭ pierapynak pamiž parami, ja vyrašyła schadzić tudy taksama, kab padtrymać studentaŭ: jany ničoha nie parušyli, heta ludzi ź vializnym uzroŭniem adkaznaści i vysokim intelektam. Ja ź imi pracuju i śćviardžaju heta ŭpeŭniena, a ź imi nie viaduć dyjałoh, a sprabujuć arhanizavać ckavańnie i adłup, jašče i z zaprašeńniem prakurora.
Paśla manałoha administracyi studentam prapanavali zadać pytańni, ale na ich nie adkazali — skazali, što hetyja pytańni moža padać u piśmovym vyhladzie i atrymać adkaz. Tady vystupiła ja, možna skazać, sa sprobaj padvieści vyniki, ale nie paśpieła — mianie absiekli.
Ja skazała, što rektarat patrabuje ad studentaŭ pavahi, u toj ža čas administracyja sieła za stały, a studenty stajać — heta narmalna? I ŭvohule było b dobra pastavić łavy ŭ chołach, kab studenty nie siadzieli na hołych prystupkach padčas pratestaŭ.
Julija Matusievič, fota z ułasnaha archiva
Siońnia ranicaj mnie pazvanili i skazali, što praz učorašniaje najlepšym varyjantam budzie zvalnieńnie pa ŭłasnym žadańni, ja jaho napisała.
Dla mianie hetaja rabota była sumiaščeńniem, tamu ja sychodžu nie ŭ nikudy. Čakaju, pakul viarnusia na hetuju pracu ŭ novych abstavinach. Ale navat kali b ja nie pracavała jak sumiaščalnik, ja b usio roŭna zrabiła ŭsio toje samaje».
Udziačnyja studenty ciapier pišuć joj słovy padtrymki ŭ sacyjalnych sietkach, Matusievič u adkaz nastaŭlaje być razumnymi i trymać nos vyšej: «Žyvie Biełaruś!»
Čytajcie taksama: «Mnie skazali, što ja pierajšoŭ miažu». Zvalniajecca vykładčyk mieda, jaki padtrymaŭ studentaŭ
